Prezident Shavkat Mirziyoyev Surxondaryoga bordi
Davlat rahbari safarini Hakim Termiziy maqbarasi ziyoratidan boshladi.
Prezident Shavkat Mirziyoyev 26-fevral kuni Surxondaryo viloyatiga tashrif buyurdi. Davlat rahbari safarini anʼanaga muvofiq, Termiz shahridagi buyuk alloma Hakim Termiziy maqbarasini ziyorat qilishdan boshladi.
Ziyorat chogʻida Qurʼon tilovat qilinib, yurtimizga tinchlik-osoyishtalik, xalqimizga farovonlik tilab duo qilindi. Shundan soʻng ulamolar bilan samimiy suhbat boʻlib oʻtdi.
Muloqot davomida islom dini rivojiga ulkan hissa qoʻshgan buyuk mutafakkir Hakim Termiziyning boy maʼnaviy-maʼrifiy merosini chuqur oʻrganish, uni yurtdoshlarimiz hamda xalqaro jamoatchilik oʻrtasida keng targʻib qilish masalalariga alohida eʼtibor qaratildi.
Shuningdek, muqaddas dinimizning ezgulik, insonparvarlik, mehr-shafqat kabi yuksak fazilatlari, milliy qadriyatlarimizni asrab-avaylash va rivojlantirishning ahamiyati taʼkidlandi. Shu asosda yosh avlodni ezgu gʻoyalar ruhida tarbiyalash, ularning qalbida Vatanga muhabbat va sadoqat tuygʻularini yanada mustahkamlash zarurligi qayd etildi.
Keyingi yillarda taʼmirlanib, yanada obod va goʻzal majmuaga aylantirilgan ushbu tabarruk maskanda ziyoratchilar uchun barcha zarur sharoitlar yaratilgan. Hudud keng koʻlamda obodonlashtirilib, maqbarada ham salmoqli qurilish va taʼmirlash ishlari amalga oshirilgan. Jumladan, zamonaviy yoritish vositalari, isitish va sovitish tizimlari oʻrnatilgan.
Majmuada qulay mikroiqlim yaratish maqsadida toʻrt mingdan ortiq, qariyb 40 turdagi koʻp yillik manzarali daraxtlar hamda 20 mingdan ziyod mavsumiy gullar ekilgan.
Islom ilmlarining tafsir, hadis, fiqh, kalom, islom falsafasi, tasavvuf tarixi va tasavvufiy qarashlar kabi yoʻnalishlarida koʻplab asarlar yaratgan mutafakkir majmuasini obod holda saqlash, ziyoratchilar uchun qulayliklarni yanada kengaytirish yuzasidan masʼullarga tegishli topshiriqlar berildi.
