Qora dengiz xavfsizligi bo‘yicha kelishuv: Bolgariya, Ruminiya va Turkiya hamkorlikni kuchaytiradi
Tomonlar kemalar harakati xavfsizligini ta’minlash uchun uch tomonlama muvofiqlashtirish mexanizmini yaratishga kelishib oldi.
Bolgariya, Ruminiya va Turkiya Qora dengizda kemalar harakati xavfsizligini ta’minlash uchun uch tomonlama muvofiqlashtirish mexanizmini yaratishga kelishib oldi. Bu haqda Bolgariya mudofaa vaziri Dimitar Stoyanovga tayanib, Point.md xabar berdi.
Kelishuv 28-oktyabr kuni Sofiyada uch mamlakat mudofaa vazirlari ishtirokida o‘tkazilgan uchrashuvda erishildi. Tomonlar Qora dengizda savdo kemalariga qarshi sodir etilgan so‘nggi hujumlarni qoralab, dengiz transporti va infratuzilmasiga tahdid soluvchi hujumlarni zudlik bilan to‘xtatishga chaqirdi.
Stoyanovning ta’kidlashicha, yangi mexanizm doirasida uch mamlakat muntazam maslahatlashuvlar o‘tkazadi, o‘zaro axborot almashadi va mintaqaviy xavfsizlikni mustahkamlash bo‘yicha amaliy choralarni belgilaydi.
Shuningdek, tomonlar Qora dengizdagi vaziyatni kuzatish, xavf-xatarlardan erta ogohlantirish va yuzaga keladigan hodisalarga tezkor javob qaytarish imkoniyatlarini yaxshilashga kelishib oldi.
Uchrashuv yakunida siyosiy darajadagi navbatdagi muzokaralarni Buxarestda, harbiy ekspertlar uchrashuvini esa Anqarada o‘tkazish rejalashtirilgani bildirildi.
Uch mamlakat ham NATO a’zosi hisoblanadi. Ularning hamkorligi Qora dengizda keskinlikni kamaytirish, dengiz qatnovi erkinligini himoya qilish va mintaqaviy barqarorlikni ta’minlashga qaratilgan.
