Surxondaryoda tomorqadan yiliga uch marta hosil olish amaliyoti kengaymoqda

 

Prezident Shavkat Mirziyoyev 26-fevral kuni Surxondaryoga tashrifi davomida, Termiz tumanidagi “Tomorqa maktabi” faoliyati bilan tanishdi.

 

Davlat rahbari dastlab suv xo‘jaligida mahalliylashtirilgan texnika va uskunalar taqdimoti bilan tanishib, suv tejash texnologiyalari va zamonaviy irrigatsiya tizimlarini mahalliy sharoitda ishlab chiqarish orqali xarajatlarni kamaytirish, iqlim o‘zgarishi sharoitida suv resurslaridan oqilona foydalanish, fermer va aholining talabini tezkor ta’minlash mumkinligi ta’kidlandi. Shu bilan birga, ilmiy hamkorlikni kuchaytirish zarurati qayd etildi.

 

“Tomorqa maktabi” aholiga tomorqalaridan samarali foydalanish, serdaromad ekin turlarini joriy etish, mahsulotlarni qayta ishlash, saqlash va qadoqlashning zamonaviy usullarini oʻrgatishga ixtisoslashgan. Muassasa banklarning moliyaviy ko‘magida faoliyat yuritadi va ishsiz hamda kam taʼminlangan oilalarning barqaror daromad manbaiga ega bo‘lishiga koʻmaklashadi.

 

Innovatsion maktab Termiz, Muzrabot, Qiziriq, Bandixon, Angor va Jarqoʻrgʻon tumanlarini qamrab oladi. U tarkibida oʻquv binosi, uch gektar issiqxona hamda uch gektar oʻquv-tajriba maydoni mavjud. Issiqxonada Surxondaryo sharoitiga moslashtirilgan banan, papayya, limon, anjir, brokkoli, bulgʻor qalampiri va boshqa ekinlar yetishtirilmoqda. Shu bilan birga koʻchatchilik, gulchilik va tomchilatib sug‘orish tizimi joriy etilgan.

 

Maktabda bir yilda uch marta hosil olish amaliyoti oʻqitilmoqda. Oʻquv jarayoniga olimlar, mutaxassislar va tajribali dehqonlar jalb etilgan. Shu paytgacha 1300 nafarga yaqin ishsiz va kambagʻal oila aʼzosi maxsus kurslarni tugatib, oʻz tomorqasi yoki ijara yerlaridan samarali foydalanish orqali oʻzini band qilgan. Hokim yordamchilari har oyda 220 nafardan, yiliga 2700 nafargacha tomorqa va ijara yer egalarini oʻqishga yoʻnaltirmoqda, yo‘llanma yoki vaucher tizimi orqali xarajatlar qoplab beriladi.

 

Kursda qatnashuvchilarga yuqori daromadli ekinlar ekish va bir sotix yerdan oʻrtacha 10–15 million so‘m daromad olish metodikasi amaliyotda koʻrsatib beriladi. “Agrostar” kompaniyalari tinglovchilarni urug‘ va koʻchatlar bilan taʼminlab, yetishtirilgan mahsulotlarni xarid qilishni tashkil etadi.

 

Davlat rahbari maktabda tomorqadan uch marta hosil olish amaliyoti, sanoatlashgan bogʻlar va suv tejovchi texnologiyalar taqdimoti bilan tanishdi, meva-sabzavotlarni qayta ishlash va eksport qilish bilan shug‘ullanuvchi tadbirkorlar bilan muloqot qildi. Shu bilan birga, hudud uchun yangi o‘simliklar, shu jumladan sitrus va tropik mevalarni yetishtirish muhimligi ta’kidlandi.