BAA, Qatar va Bahrayn havo hududi vaqtincha yopildi
Abu-Dabida portlashlar qayd etilgan.
Fors ko‘rfazi mamlakatlari — Bahrayn, Qatar hamda BAA mintaqadagi keskin vaziyat sabab o‘z havo hududlarini vaqtincha yopganini ma’lum qildi.
TASS agentligi xabariga ko‘ra, Qatar va Bahrayn o‘z hududlarida fuqarolik reyslarini to‘liq cheklagan. BAA esa xavfsizlik chorasi sifatida havo hududini qisman yopganini bildirgan.
Mahalliy OAV ma’lumotlariga ko‘ra, Abu-Dabida portlashlar qayd etilgan. Shuningdek, Bahrayn va Qatardagi AQSh harbiy bazalariga nisbatan raketa zarbalari berilgani haqida tasdiqlanmagan xabarlar tarqalgan.
Rossiyaning Qatardagi elchixonasi Rossiya fuqarolarini ehtiyotkor bo‘lishga, harbiy inshootlardan uzoqroq yurishga va zarurat bo‘lmaganda tashqariga chiqmaslikka chaqirgan.
Avvalroq Eron ham Isroil bilan bog‘liq harbiy keskinlik ortidan o‘z havo hududini yopgan edi. Rossiya Transport vazirligi esa Rossiya aviakompaniyalarining BAAga parvoz yo‘nalishlariga o‘zgartirishlar kiritilishini e’lon qilgan.
