Samarqandda maktab o‘quvchisi boshqaruvidagi avtomobil 5 yoshli qizchani urib ketdi

Samarqand viloyatida voyaga yetmagan haydovchi ishtirokida yo‘l-transport hodisasi sodir bo‘ldi. Bu haqda viloyat Ichki ishlar boshqarmasi ma’lum qildi.

 

Qayd etilishicha, 22-mart kuni soat taxminan 11:55 da Urgut tumanidagi “Chor chinor” mahallasida Gentra rusumli avtomobil 5 yoshli qizchani urib yuborgan.

 

Hodisani sodir etgan haydovchi voqea joyidan qochib ketib, jabrlanuvchini xavfli holatda qoldirgan.

 

Tezkor choralar natijasida huquqbuzar aniqlangan. Ma’lum bo‘lishicha, u mahalliy maktablardan birining 11-sinf o‘quvchisi bo‘lib, transport vositasini tegishli hujjatlarsiz boshqargan.

 

Mazkur holat yuzasidan haydovchiga nisbatan ma’muriy bayonnoma rasmiylashtirilib, ish materiallari sudga yuborilgan. Avtomobil esa jarima maydoniga joylashtirilgan.

 

Hodisa oqibatida jabrlangan 5 yoshli qizcha shifoxonaga yotqizilgan.