Xorijga chiqish taqiqini yechib berish va’dasi: bank bosh mutaxassisi pora olayotganda ushlandi
Holat yuzasidan Jinoyat kodeksining 168-moddasi bilan jinoyat ishi qo‘zg‘atilgan.
Andijon viloyatida fuqaroning xorijga chiqishiga qo‘yilgan taqiqni olib tashlab berishni va’da qilgan tijorat banki bosh mutaxassisi ushlandi.
Bosh prokuratura huzuridagi Departamentning Andijon viloyati boshqarmasi va boshqa huquqni muhofaza qiluvchi organlar xodimlari hamkorligida o‘tkazilgan tezkor tadbirda tijorat bankining Andijon hududiy boshqarmasi bosh mutaxassisi B.U. qo‘lga olingan.
Qayd etilishicha, u fuqaro A.A.ning bank krediti bo‘yicha qarzdorligi sabab Majburiy ijro byurosi tomonidan qo‘yilgan xorijga chiqish taqiqini olib tashlab berish evaziga 5,5 mln so‘m olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilgan. Hozirda tergov harakatlari olib borilmoqda.
