Noqonuniy “Umra” xizmati: ikki holat yuzasidan jinoyat ishi qo‘zg‘atildi
Samarqand va Sirdaryodagi holatlarda fuqarolardan “Umra” ziyoratini tashkil etish evaziga jami 4300 AQSH dollari talab qilingan.
Samarqand va Sirdaryo viloyatlarida fuqarolarni noqonuniy ravishda “Umra” ziyoratiga yuborishni va’da qilib, pul talab qilgan shaxslar ushlandi.
Samarqand viloyatining Payariq tumanida faoliyat yurituvchi aviakassa rahbari tegishli vakolatga ega bo‘lmaganiga qaramay, mahalliy fuqaroni Saudiya Arabistoniga “Umra” ziyoratiga yuborishni va’da qilgan. Buning evaziga undan 1150 AQSH dollari talab qilingan.
Davlat xavfsizlik xizmati va ichki ishlar organlari xodimlari hamkorligida o‘tkazilgan tezkor tadbir davomida aviakassa rahbari so‘ralgan pulni olayotgan vaqtida ashyoviy dalillar bilan ushlandi.
Sirdaryo viloyatidagi holatda esa Guliston tumanida yashovchi, 1988-yilda tug‘ilgan shaxs uch nafar fuqaroni Toshkent shahridagi turistik firma orqali Saudiya Arabistoniga “Umra” ziyoratiga yuborishni va’da qilgan. U buning evaziga jami 3150 AQSH dollari talab qilgan.
Mazkur shaxs so‘ralgan mablag‘ hisobidan 3,5 million so‘mni oldindan olayotgan vaqtida Davlat xavfsizlik xizmati, Iqtisodiy jinoyatlarga qarshi kurashish departamenti hamda ichki ishlar organlari xodimlari tomonidan ushlandi.
Qayd etilishicha, har ikki holat yuzasidan jinoyat ishlari qo‘zg‘atilgan. Hozirda tergov harakatlari olib borilmoqda.
Mutasaddilar fuqarolarni “Umra” ziyoratini tashkil etish bo‘yicha xizmatlardan foydalanishda tegishli vakolat va hujjatlarga ega tashkilotlarni tanlashga chaqirmoqda.
