Noqonuniy kriptovalyuta aylanmasi: 683 ming dollarlik operatsiyalar aniqlandi
Fuqaroning litsenziya olmasdan kripto-aktivlarni o‘tkazish bilan shug‘ullangani aniqlangan.
Toshkentda 41 yoshli fuqaro litsenziyasiz ravishda kripto-aktivlarni noqonuniy o‘tkazish va ayirboshlash bilan shug‘ullangani aniqlanib, unga nisbatan jinoyat ishi qo‘zg‘atildi. Bu haqda IIV Kiberjinoyatlarga qarshi kurashish departamenti xabar berdi.
Ma’lum bo‘lishicha, 1985-yilda Qashqadaryo viloyatida tug‘ilgan, Toshkent shahrida yashovchi fuqaro 2021–2025-yillar davomida qonunchilikda belgilangan tartibda litsenziya olmagan holda mobil telefoni orqali Binance xalqaro kripto-birjasida maxsus akkaunt ochgan.
U ushbu akkaunt orqali qariyb 700 ta kriptoaktiv oldi-sotdi operatsiyasini amalga oshirgan. Operatsiyalarning dastlabki qiymati 683 ming AQSH dollari, ya’ni 9 milliard so‘mdan ortiqni tashkil qilgan.
Fuqaro mazkur kriptoaktivlarni qonunga xilof ravishda o‘tkazish va ayirboshlash bilan shug‘ullangani aniqlangan.
Holat yuzasidan Qashqadaryo viloyati IIB Kiberjinoyatlarga qarshi kurashish boshqarmasi tergov bo‘limi tomonidan Jinoyat kodeksining 278-8-moddasi 3-qismi “a” bandi bilan jinoyat ishi qo‘zg‘atilgan.
Hozirda dastlabki tergov harakatlari olib borilmoqda.
