YPX xodimini obro‘sizlantiruvchi video tarqatildi: fuqaro 10 sutkaga qamaldi
Sudda fuqaro qilgan ishidan pushaymonligini bildirib, aybiga iqror bo‘ldi va bunday holatni boshqa takrorlamasligini aytdi.
Ijtimoiy tarmoqlarda YPX xodimini obro‘sizlantiruvchi video tarqatgan fuqaro 10 sutka ma’muriy qamoq jazosiga hukm qilindi.
Ma’lum bo‘lishicha, fuqaro iyun oyida YPX xodimining to‘xtash haqidagi talabiga bo‘ysunmay, harakatni davom ettirgan. Holat yuzasidan unga nisbatan bayonnoma rasmiylashtirilgan. Shundan so‘ng fuqaro YPX xodimi bilan bog‘liq videoni o‘zining ijtimoiy tarmoqdagi sahifasiga joylashtirgan.
Fuqaro qilgan ishidan pushaymon ekanini bildirib, aybiga iqror bo‘lgan. U YPX xodimi va uning oila a’zolaridan uzr so‘ragan hamda bunday holat boshqa takrorlanmasligini aytgan.
Mazkur holat bo‘yicha fuqaroning harakatlarida Ma’muriy javobgarlik to‘g‘risidagi kodeksning 195¹²-moddasi birinchi qismida nazarda tutilgan huquqbuzarlik alomatlari aniqlangan.
2026-yil 24-sentyabr kuni jinoyat ishlari bo‘yicha Qarshi shahar sudi tomonidan fuqaro Ro‘yiddinovga nisbatan ushbu modda asosida 10 sutka ma’muriy qamoq jazosi tayinlandi.
Sudda fuqaro yoshlarga murojaat qilib, bunday xatti-harakatni takrorlamaslikni so‘ragan.
