Buxoroda zararli APK fayllar tarqatgan guruh ushlandi: 60 dan ortiq fuqaro jabr ko‘rgan
Gumonlanuvchilar Telegram orqali zararli APK fayllarni yuborib, qurilmalardagi bank ma’lumotlari va SMS-kodlarni qo‘lga kiritgan.
Buxoroda Telegram orqali zararli APK fayllar tarqatib, fuqarolarning bankdagi mablag‘larini o‘zlashtirganlikda gumonlangan shaxslar ushlandi. Bu haqda IIV Kiberjinoyatlarga qarshi kurashish departamenti xabar berdi.
Dastlabki tergovga ko‘ra, jinoyat sxemasini Samarqand viloyatida yashovchi 20 yoshga to‘lmagan yigit va uning turli hududlardagi sheriklari tashkil qilgan.
Guruh a’zolari Telegram’dagi yashirin boshqariladigan akkauntlar orqali fuqarolarning telefonlariga zararli APK fayllarni yuborgan. Dastur qurilmaga o‘rnatilgach, foydalanuvchilarning bank ma’lumotlari hamda pul o‘tkazmalarini tasdiqlash uchun keladigan SMS-kodlar jinoyatchilar nazoratiga o‘tgan.
Shundan so‘ng o‘g‘irlangan mablag‘lar begona shaxslar nomiga ochilgan tranzit bank kartalari va soxta akkauntlarga o‘tkazib yuborilgan.
Gumonlanuvchilar qo‘lga olinganida o‘nlab bank kartalari, SIM-kartalar va maxsus mobil qurilmalar ashyoviy dalil sifatida rasmiylashtirilgan.
Qayd etilishicha, mazkur sxemadan respublika bo‘ylab 60 nafardan ortiq fuqaro zarar ko‘rgan.
Holat yuzasidan Jinoyat kodeksining 169-moddasi uchinchi qismi “b” bandi bilan jinoyat ishi qo‘zg‘atilgan. Hozirda guruhga aloqador boshqa shaxslarni aniqlash, ularni javobgarlikka tortish hamda jabrlanganlarning huquqlarini tiklash bo‘yicha tergov harakatlari olib borilmoqda.
