Xayriya pullari totalizatorga tikildi: Farg‘onada yosh yigit ushlandi

Farg‘ona viloyatida 2007-yilda Toshkent shahrida tug‘ilgan yigit firibgarlik va kiberjinoyat sodir etganlikda gumonlanib ushlandi. U ijtimoiy tarmoqlarda xayriya uchun yig‘ilgan mablag‘larni o‘zlashtirgani aniqlangan.

 

Farg‘ona viloyati Ichki ishlar boshqarmasi Kiberjinoyatlarga qarshi kurashish boshqarmasi xodimlari tomonidan o‘tkazilgan tezkor tadbirlar davomida gumondorning O‘zbekistonda kriptoaktivlar savdosi bilan bog‘liq qonunchilik talablarini muntazam buzib kelgani ham aniqlangan.

 

U noqonuniy muomalaga kiritgan kriptoaktivlarning umumiy qiymati 408 ming AQSH dollaridan oshgan. Bu milliy valyutada 4 milliard 894 million 152 ming so‘mni tashkil etadi.

 

Surishtiruv davomida yigit ijtimoiy tarmoqlarda yordam so‘rab murojaat qilgan fuqarolarning mablag‘larini o‘zlashtirish uchun firibgarlik sxemasidan foydalangani aniqlangan.

 

Xususan, u Instagram’da bemor uchun xayriya mablag‘lari yig‘ilayotganini ko‘rib, Telegram’da bloger nomidan soxta akkaunt ochgan. U bemor nomidan mablag‘ yig‘ayotgan shaxsga yozib, kartaga tushgan pullarni vaqtincha o‘z hisobiga o‘tkazib turishni, keyinchalik naqd holatda yetkazib berishini aytgan.

 

Shu yo‘l bilan u jabrlanuvchidan qariyb 43 million so‘mni o‘zlashtirgan. Shuningdek, jabrlanuvchining tanishi bo‘lgan Paynet shoxobchasi xodimidan ham shu bahona bilan 30 million so‘mdan ortiq mablag‘ni o‘z kartasiga o‘tkazdirgan.

 

Gumondor tergov davomida o‘zlashtirilgan mablag‘larning bir qismini onlayn totalizator hisobiga o‘tkazib, yutqazganini bildirgan. Uning so‘zlariga ko‘ra, jami 76 million so‘mni totalizatorda tikib, boy bergan.

 

Holat yuzasidan unga nisbatan Jinoyat kodeksining 168-moddasi 3-qismi “b” va “v” bandlari hamda 278¹⁸-moddasi 3-qismi “a” bandi bilan jinoyat ishi qo‘zg‘atilgan.

 

Hozirda jinoyat ishi doirasida tergov harakatlari olib borilmoqda.