O‘zbekistonda ikki narkojinoiy guruh fosh etildi
Guruhning 7 nafar a’zosi qo‘lga olindi.
“Xavfsiz va sog‘lom yurt” tezkor-profilaktik tadbirlari doirasida huquqni muhofaza qiluvchi organlar tomonidan yirik narkojinoyat tarmoqlari fosh etildi. Bu haqda O‘zA xabar berdi.
Ichki ishlar vazirligi ma’lum qilishicha, ikki uyushgan jinoiy guruhning 7 nafar a’zosi qo‘lga olingan.
Tezkor ma’lumotlarga ko‘ra, transmilliy jinoiy uyushma a’zolari qo‘shni davlatdan Toshkent orqali Rossiyaga katta miqdordagi giyohvandlik vositalarini kontrabanda yo‘li bilan olib o‘tishni rejalashtirgan.
O‘tkazilgan tezkor-qidiruv tadbirlari davomida Toshkent shahrining Yangihayot tumanida joylashgan dala maydoniga yashirilgan 71 kilogramm 84 gramm giyohvandlik vositasini olib ketayotgan 4 nafar shaxs qo‘lga olindi. Ular mazkur giyohvand moddalarni Rossiyada yashovchi tanishining ko‘rsatmasi asosida olib, xorijga yuborishi kerak bo‘lgan. Ushbu holat orqali 355 mingdan ortiq dozadagi giyohvandlik vositalarining noqonuniy aylanmasiga chek qo‘yildi.
Tezkor tadbirlar Surxondaryo viloyatining Denov tumanida ham davom ettirildi. Bu yerda 1969-yilda tug‘ilgan shaxs 150 ming AQSH dollari evaziga 8 kg giyohvandlik vositasini sotayotgan vaqtida ushlandi.
Tergov davomida u ushbu moddalarni tanishidan olgani aniqlanib, keyinchalik yana ikki shaxs ham qo‘lga olindi. Natijada qo‘shimcha ravishda 40 ming dozaga teng giyohvandlik vositalarining tarqalishining oldi olindi.
Mazkur holatlar yuzasidan Jinoyat kodeksining 273-moddasi 5-qismi bilan jinoyat ishi qo‘zg‘atilib, gumonlanuvchilar qamoqqa olingan.
Shuningdek, Andijon shahrida kuchli ta’sir qiluvchi dori vositalarining noqonuniy savdosi ham fosh etildi. Bir ayol va ikki erkak “Tropikamid” va “Pregabalin” preparatlarini noqonuniy saqlab, realizatsiya qilmoqchi bo‘lgan vaqtida qo‘lga olindi.
Ko‘zdan kechirish jarayonida gumonlanuvchilardan jami 6,5 ming donaga yaqin “Regapen” va “Tropikamid” nomli dori vositalari, shuningdek noma’lum suyuqlik va kapsulalar musodara qilindi.
Ushbu holat yuzasidan ham jinoyat ishi qo‘zg‘atilgan bo‘lib, tergov harakatlari davom etmoqda.
