Samarqandda AQSHdan jo‘natilgan narkotik to‘xtatib qolindi
U elektron tamaki ichiga solingan holda va kuryerlik orqali yuborilgan.
Samarqand viloyatida Amerikadan jo‘natma sifatida yuborilgan giyohvandlik moddalari to‘xtatib qolindi. Bu haqda “Toshkent-AERO” ixtisoslashtirilgan bojxona kompleksi axborot xizmati xabar berdi.
Qayd etilishicha, kuryerlik jo‘natmalari orqali giyohvandlik moddalarining olib kirilishi va realizatsiyasiga qarshi navbatdagi tezkor-qidiruv tadbirlari o‘tkazilgan.
Tezkor tadbir davomida Samarqand shahrida yashovchi ikki nafar fuqaro AQSHdan yuborilgan, ichida 75 gr og‘irlikdagi jami 68 dona “gashish moyi” mavjud bo‘lgan elektron sigaret (veyp)lar solingan jo‘natmani qabul qilib olayotgan vaqtida qo‘lga olingan.
Hozirda mazkur holat yuzasidan bojxona organlari tomonidan jinoyat ishi qo‘zg‘atilgan.
Eslatib o‘tamiz, respublika bojxonachilari tomonidan joriy yilning shu davriga qadar 208 ta holatda salkam 558 kg giyohvandlik vositalarining olib o‘tilishi oldi olingan.
