Sifati kafolatlanmagan dori vositalari fosh etildi

Parkent tumanidagi “Parkent erkin iqtisodiy” zonasida farmatsevtika mahsulotlari ishlab chiqaruvchi MCHJ tekshirilganda sifati kafolatlanmagan dori vositalari topildi. Bu haqda DXX xabar berdi.

 

Ma’lum qilinishicha, tekshiruv natijasida korxona omborxonasida yaroqlilik muddati tugagan 55 840 dona “Menovazin”, 25 000 dona “Vodorod peroksidi”, 50 800 dona “Etil spirti” hamda 28 million 270 mingdan ortiq yorliq va etiketkalar saqlanayotgani aniqlangan. 

 

Ma’lum bo‘lishicha, yaroqlilik muddati tugagan dori vositalari 2025-2026-yillarda ishlab chiqarilgan degan ma’lumotlar bilan qayta qadoqlanib, sotuvga chiqarilishi rejalashtirilgan.

 

Shu bilan birga, poytaxtda Farg‘ona shahrida yashovchi 1987-yilda tug‘ilgan fuqaro to‘xtatilib, uning qo‘l yuklari tekshirilganda, O‘zbekistonga olib kirilishi taqiqlangan, taxminiy qiymati 763 mln so‘mni tashkil etuvchi 19 turdagi jami 6 597 dona dori vositalari aniqlandi.

 

Dastlabki surishtiruv jarayonida mazkur shaxs dori vositalarini Hindistondan olib kelib, sotishni 1984-yilda tug‘ilgan tanishi bilan birgalikda amalga oshirishi ma’lum bo‘ldi. Uning xonadoni ham ko‘zdan kechirilib, taxminiy qiymati 48 mln so‘mga teng bo‘lgan 107 dona dori vositalari topildi.

 

Hozirda har ikki holat bo‘yicha ashyoviy dalil sifatida olingan dori vositalariga ekspertiza tayinlanib, surishtiruv ishlari olib borilmoqda.