Toshkentda o‘zini ayol sifatida tanishtirib, pul talab qilgan guruh ushlandi
Ular turli yoshdagi erkaklarni aldab, uchrashuvga chaqirgan.
Toshkentda o‘zini ayol sifatida tanishtirib, erkaklardan pul talab qilgan besh nafar yigit huquq-tartibot organlari tomonidan qo‘lga olindi.
Ma’lum bo‘lishicha, 18–21 yoshdagi shaxslar Telegram messenjeri orqali o‘zlarini ayol deb tanishtirib, turli yoshdagi erkaklar bilan tanishgan va ularni uchrashuvga chaqirgan. Uyga kirgan jabrlanuvchi sportchilar deb ataluvchi guruh a’zolari tomonidan haqorat qilinib, kaltaklangan. Voqea videoga olinib, 10 million so‘m talab qilingan.
Jinoiy guruh talab qilingan pulning 5 million so‘mini olgan paytda huquq-tartibot organlari tomonidan ushlangan. Pulni topshirishdan bosh tortilgan taqdirda, jinoyatchilar video yozuvlarni internetga chiqarish va omma oldida sharmanda qilish bilan tahdid qilgan.
Tergov davomida aniqlanishicha, guruh tashkilotchisi ilgari O‘zbekiston Respublikasi Jinoyat kodeksining 120-moddasi bo‘yicha sudlangan shaxs bo‘lib, guruhga turli sport turlari bilan shug‘ullanuvchi shaxslarni jalb qilgan.
Mazkur holat yuzasidan jinoyat kodeksining 165-moddasi 2-qismi “v” bandi bilan jinoyat ishi qo‘zg‘atilib, tergov harakatlari davom etmoqda.
