Toshkentda narkolaboratoriya fosh etildi
Laboratoriyani tashkil qilgan shaxs va bu yerda kimyogar sifatida ishlovchi fuqaro qo‘lga olingan.
Toshkent shahrida giyohvandlik vositalarining noqonuniy aylanmasiga qarshi kurash doirasida yirik narkolaboratoriya fosh qilindi. Bu haqda DXX xabar berdi.
Ma’lum qilinishicha, DXX Toshkent viloyati bo‘yicha boshqarmasi hamda ichki ishlar organlari xodimlari hamkorligida o‘tkazilgan tezkor-qidiruv tadbirlarida Sergeli tumanida joylashgan xonadonda noqonuniy narkolaboratoriya aniqlangan.
Xabarga ko‘ra, 2003-yilda tug‘ilgan, Toshkent viloyati Chinoz tumanida yashovchi shaxs ko‘p qavatli uydan ijaraga olingan xonadonda mazkur laboratoriyani tashkil etgan. Tezkor tadbir davomida ushbu manzildan umumiy qiymati 4,5 milliard so‘mga teng bo‘lgan 3,5 kilogramm “Pregabalin” kuchli ta’sir qiluvchi moddasi, 20 litr suyuq va 25 kilogramm kukun ko‘rinishidagi prekursorlar, shuningdek, ularni tayyorlash va qadoqlashda foydalanilgan jihozlar ashyoviy dalil sifatida olingan.
Shuningdek, narkolaboratoriyada kimyogar sifatida faoliyat yuritgan yana bir fuqaro ham qo‘lga olingan.
Ushbu shaxslar dastlab “Telegram” orqali faoliyat yurituvchi noqonuniy narkodo‘konlarda “kladmen” sifatida kuchli ta’sir qiluvchi moddalarni tarqatish bilan shug‘ullangan. Keyinchalik esa jinoiy guruh rahbarlarining ishonchini qozongach, giyohvand moddalarni tayyorlash jarayoniga jalb etilgan.
Holat yuzasidan mazkur shaxslarga nisbatan jinoyat ishi qo‘zg‘atilib, ularga nisbatan qamoq ehtiyot chorasi qo‘llangan. Hozirda tergov harakatlari davom etmoqda.
