Xorazmda payvandlash uskunasiga yashirilgan giyohvand moddalar topildi
Fuqaro giyohvand moddalarni sotmoqchi bo‘lgan.
Xorazm viloyatida giyohvand moddani payvandlash uskunasiga yashirgan fuqaro qo‘lga olindi. Bu haqda DXX ma’lum qildi.
Ma’lum qilinishicha, Qo‘shko‘pir tumanida o‘tkazilgan tadbir davomida avtoturargohda turgan shaxs tekshirilganda uning yuk sumkasidagi payvandlash uskunasi ichiga yashirin tarzda 1 kg 460 gramm geroin va 27 gramm opiy joylashtirilgani aniqlangan.
Dastlabki ma’lumotlarga ko‘ra, ushbu giyohvandlik moddasi xorijdan olib kelingan bo‘lib, uni viloyat hududida sotish orqali daromad olish rejalashtirilgan.
Mazkur holat yuzasidan jinoyat ishi qo‘zg‘atilgan. Hozirda ushbu jinoyatga aloqador boshqa shaxslarni aniqlash bo‘yicha tezkor-tergov harakatlari olib borilmoqda.
