Farg‘onada giyohvand moddalar savdosi bilan shug‘ullangan shaxslarga sud hukmi o‘qildi
Ularga 12 yildan 15 yilgacha ozodlikdan mahrum qilish jazosi tayinlandi.
Farg‘ona viloyatida giyohvand moddalar savdosi bilan shug‘ullangan bir guruh shaxslar qo‘lga olindi. Bu haqda DXX xabar berdi.
Ma’lum qilinishicha, avval narkokuryerlar tomonidan yirik miqdordagi giyohvandlik vositalari Afg‘onistondan kontrabanda yo‘li bilan Surxondaryo viloyatiga olib kirilgan. Keyinchalik ushbu moddalar Farg‘ona viloyatining Yozyovon tumani hududidagi dala maydoniga yashirib qo‘yilgan.
O‘tkazilgan tezkor tadbir davomida Marg‘ilon shahrida yashovchi 1983-yilda tug‘ilgan xususiy tadbirkor hamda uning 1989-yilda tug‘ilgan sherigi yashirin joydan jami 9 kg 896 gramm “gashish” moddasini olayotgan vaqtda ashyoviy dalillar bilan qo‘lga olindi.
Shuningdek, qo‘lga olish jarayonida voqea joyidan qochishga uringan tadbirkor yonidan 14,5 ming dollar hamda 6 million 250 ming so‘m pul mablag‘lari ham musodara qilindi.
Tergovga qadar tekshiruv davomida ushbu jinoyatga aloqador deb topilgan Farg‘ona shahrida yashovchi 1980-yilda tug‘ilgan fuqaroning xonadonidan 110 gramm “opiy” moddasi, ikkita elektron tarozi, 1200 dollar va 28 million so‘m pul mablag‘lari aniqlanib, daliliy ashyo sifatida rasmiylashtirildi.
Tergov harakatlari davomida mazkur jinoiy guruhga 1990 va 1995-yillarda tug‘ilgan aka-ukalarning ham aloqadorligi aniqlangan.
Jinoyat ishlari bo‘yicha Bog‘dod tuman sudi hukmiga ko‘ra, jami 5 nafar sudlanuvchi Jinoyat kodeksining 246, 273 va 276-moddalari bilan aybdor deb topilib, ularga 12 yildan 15 yilgacha ozodlikdan mahrum qilish jazosi tayinlandi.
