Mast holda PPX xodimiga musht tushirgan fuqaro ushlandi

Toshkent shahrida mast holda avtomobil boshqarib, yo‘l-transport hodisasiga sabab bo‘lgan fuqaroning IIO xodimiga qarshilik ko‘rsatib qo‘l ko‘targani aks etgan video tarqaldi. Holat yuzasidan Toshkent shahar IIBB ma’lumot berdi.

 

Ma’lum qilinishicha, 30-mart kuni tungi vaqtda Yashnobod tumanida Malibu va Leapmotor rusumli avtomobillar ishtirokida to‘qnashuv yuz bergan. Voqeadan so‘ng Leapmotor haydovchisi 102 raqamiga murojaat qilib, Malibu haydovchisi avariya sodir etgani va qo‘pol muomala qilganini bildirgan.

 

Hodisa joyiga yetib kelgan YPX xodimlari Malibu haydovchisini alkotester orqali tekshiruvdan o‘tkazmoqchi bo‘lgan. Biroq haydovchi qonuniy talablarga bo‘ysunmasdan, xodimlarga faol qarshilik ko‘rsatgan va ulardan birining yuziga ikki marta musht tushirgan.

 

Shundan so‘ng xodimlar o‘zlari va atrofdagilar xavfsizligini ta’minlash maqsadida maxsus vositalar qo‘llab, uni zararsizlantirgan.

 

Hozirda qonunbuzar protsessual tartibda ushlangan. Unga nisbatan Jinoyat kodeksining 219-moddasi 2-qismi hamda 277-moddasi 3-qismi “g” bandi bilan jinoyat ishi qo‘zg‘atilgan.