Toshkent viloyatida advokat pora bilan qo‘lga olindi
U sud hukmini o‘zgartirib berish uchun fuqarodan pul talab qilgan.
Toshkent viloyatida advokat sud hukmini o‘zgartirishni va’da qilib, pora olgan vaqtida qo‘lga olindi. Bu haqda Davlat xavfsizlik xizmati ma’lum qildi.
Ma’lum qilinishicha, tezkor tadbir davomida advokatlik byurosi advokati mahalliy fuqaroga nisbatan sud tomonidan tayinlangan 2 yillik ozodlikdan mahrum qilish jazosini o‘zining sud tizimidagi tanishlari orqali ozodlikni cheklash jazosiga almashtirib berishni va’da qilgan.
U ushbu “xizmat” evaziga 10 ming AQSH dollari olgan vaqtida ashyoviy dalillar bilan ushlangan.
Hozirda mazkur holat yuzasidan jinoyat ishi qo‘zg‘atilgan bo‘lib, tergov harakatlari davom etmoqda.
