Farg‘onada bank xodimi mijozni o‘ldirgani aniqlandi
Xodim mijozni pichoqlab o‘ldirib, uni Katta Farg‘ona kanaliga tashlab yuborgan.
Farg‘onada avtokredit rasmiylashtirmoqchi bo‘lgan fuqaro bank xodimi tomonidan o‘ldirildi. Bu haqda Kun.uz xabar berdi.
Dastlabki ma’lumotlarga ko‘ra, S.E. joriy yilning 31 mart kuni avtokredit rasmiylashtirish maqsadida Qo‘qon shahridagi banklardan biriga borgan va shundan so‘ng bedarak yo‘qolgan. Yaqinlarining bildirishicha, u bank binosini xodimlardan biri bilan birga tark etgan, biroq oradan ikki soat o‘tib xodim yolg‘iz qaytib kelgan.
Ma’lum qilinishicha, Bosh prokuratura axborot xizmati tergovga qadar tekshiruv davomida Qo‘qon shahridagi banklardan birining kredit bo‘limi mutaxassisi A.T. gumonlanuvchi sifatida qo‘lga olinganini bildirgan. U mijozni o‘ldirib, jasadni Katta Farg‘ona kanaliga tashlab yuborganiga iqror bo‘lgan.
Gumonlanuvchining ko‘rsatmalariga ko‘ra, S.E. bank filialiga aksiya doirasida avtokredit olish uchun kelgan. Ular o‘rtasida tortishuv yuzaga kelgan va keyinchalik masalani muhokama qilish uchun gumonlanuvchining avtomashinasida yo‘lga chiqishgan. O‘zbekiston tumani “Taraqqiyot” MFY hududida avtomobil ichida gumonlanuvchi oshxona pichog‘i bilan fuqaroning bo‘yin qismiga bir necha bor zarba berib, uni o‘ldirgan.
Shundan so‘ng u ish joyiga qaytib kelib, jasadni mashinada qoldirgan. Bank xodimi taxminan soat 19:00 gacha ishda bo‘lganidan keyin, Katta Farg‘ona kanalining O‘zbekiston tumani To‘lash mahallasi hududidan oqib o‘tuvchi qismiga borib, jasadni suvga tashlab yuborgan.
Mazkur holat yuzasidan Jinoyat kodeksining 97-moddasi 1-qismi (qasddan odam o‘ldirish) bilan jinoyat ishi qo‘zg‘atilib, A.T. protsessual tartibda ushlangan. Ayni vaqtda jabrlanuvchining jasadi topilmagan bo‘lib, qidiruv ishlari davom etmoqda.
Qidiruv ishlariga Favqulodda vaziyatlar vazirligining Farg‘ona viloyati boshqarmasi xodimlari hamda mahalliy aholi vakillari jalb etilgan.
Eslatib o‘tamiz, avvalroq Toshkent viloyatining Bo‘ka tumanida ham IIB xodimi bilan bog‘liq hodisada jabrlanuvchining jasadi Farhod kanalidan 80 kundan so‘ng topilgan edi.
