Namanganda bolalarga zo‘ravonlik qilgan ayolga sud hukmi o‘qildi

Namangan viloyati Pop tumanida qaramog‘idagi voyaga yetmagan bolalarga nisbatan zo‘ravonlik qilgan ayolga nisbatan sud hukmi e’lon qilindi. Bu haqda “Daryo” sud hujjatlariga tayanib xabar berdi.

 

Ma’lum qilinishicha, 1986-yilda tug‘ilgan N.S. 2025-yil aprel oyida Namangan shahridagi mehribonlik uyi negizida tashkil etilgan ikki oylik o‘quv kursini tamomlagan. Shundan so‘ng, may oyida u 2019 va 2023-yillarda tug‘ilgan ikki nafar bolani shartnoma asosida vasiylikka olgan. Bolalarni parvarish qilgani uchun unga davlat tomonidan har oy 6 million so‘m miqdorida mablag‘ ajratib borilgan.

 

Sud hujjatlariga ko‘ra, ayol 20–27-oktyabr kunlari davomida turli bahonalar bilan bolalarni muntazam ravishda urib, ularga jismoniy hamda ruhiy azob yetkazgan. Shuningdek, u bolalarni ushbu holat haqida boshqalarga aytmaslikka majbur qilib, aks holda ularni sharoiti og‘ir joyga berib yuborish bilan qo‘rqitgan.

 

27-oktyabr kuni bolalar tarbiyalanayotgan maktabgacha ta’lim muassasasi direktori ularning holatini payqab, Pop tumani “Inson ijtimoiy xizmatlari” markaziga hamda huquqni muhofaza qiluvchi organlarga murojaat qilgan.

 

Sud jarayonida ayblanuvchi o‘z ko‘rsatmasida ukasining Rossiyada vafot etgani haqidagi xabardan so‘ng ruhiy tushkunlikka tushganini, shu sabab bolalarga nisbatan yomon munosabatda bo‘lganini bildirgan va qilgan ishidan pushaymon ekanini aytgan.

 

Jinoyat ishlari bo‘yicha Pop tumani sudi hukmiga ko‘ra, N.S. Jinoyat kodeksining 110-moddasi 2-qismi “a” va “v” bandlari bilan aybli deb topilib, unga 2 yil muddatga ozodlikni cheklash jazosi tayinlandi.

 

Bolalar ayolning vasiyligidan olinib, boshqa oilaviy bolalar uyiga joylashtirilgan.

 

Avvalroq Toshkent shahrining Yunusobod tumanida 13 yoshli qizga nisbatan zo‘ravonlik qilgan o‘gay onaga nisbatan ham jinoyat ishi qo‘zg‘atilgani haqida xabar berilgandi.