Toshkentda bank eksperti pora bilan qo‘lga olindi
U 1 milliard so‘mdan ortiq kredit ajratib berish uchun tadbirkordan pul talab qilgan.
Toshkent shahrida yirik miqdorda pora olish bilan bog‘liq jinoyat fosh etildi. Bu haqda DXX xabar berdi.
Ma’lum qilinishicha, korrupsiyaga qarshi kurashish doirasida Davlat xavfsizlik xizmati Toshkent shahar boshqarmasi hamda Bosh prokuratura huzuridagi Iqtisodiy jinoyatlarga qarshi kurashish departamenti xodimlari hamkorligida tezkor tadbir o‘tkazilgan.
Tadbir davomida poytaxtda faoliyat yurituvchi yirik aksiyadorlik tijorat banklaridan birining katta eksperti xizmat ko‘rsatish sohasida ish yurituvchi MCHJ rahbaridan 10 ming AQSH dollari miqdorida pulni tamagirlik yo‘li bilan olayotgan vaqtida ashyoviy dalillar bilan ushlangan.
Tergov ma’lumotlariga ko‘ra, gumonlanuvchi o‘z tanishlari orqali Samarqand viloyatida joylashgan banklardan biridan mazkur MCHJga 1 mlrd 250 mln so‘m miqdorida kredit ajratib berishni va’da qilgan.
Hozirda ushbu holat yuzasidan jinoyat ishi qo‘zg‘atilgan bo‘lib, tergov harakatlari davom etmoqda.
