Toshkentda giyohvand moddalar savdosi bilan shug‘ullangan talabalar ushlandi
Tekshiruvlar natijasida 1 kilogrammdan ortiq turli turdagi giyohvandlik vositalari tarqalishining oldi olingan.
Toshkent shahrida giyohvand moddalar savdosi bilan shug‘ullangan bir guruh shaxslar, jumladan talabalar ushlandi. Bu haqda O‘zbekiston Ichki ishlar vazirligi xabar berdi.
Ma’lum qilinishicha, Mirobod va Mirzo Ulug‘bek tumanlarida jami 1 kilogramm 604 gramm turli turdagi giyohvandlik vositalarining noqonuniy tarqalishi oldi olingan.
Xususan, 2004-yilda tug‘ilgan talaba yigit Mirobod tumanida “zakladka” usulida izolyatsion lenta bilan o‘ralgan marixuanani joylashtirayotgan vaqtida ushlangan. Aniqlanishicha, u uch oy davomida Telegram’dagi noqonuniy “narkodo‘kon” ko‘rsatmalari asosida yirik miqdordagi giyohvandlik vositalarini tarqatib kelgan.
Yigitning ijaradagi yashash xonadonidan 698 gramm alfa-PVP, 471 gramm mefedron, 433 gramm marixuana, shuningdek, elektron tarozilar, 600 dona zip-paket, izolyatsion lenta va noma’lum suyuqliklar topilib, ashyoviy dalil sifatida rasmiylashtirilgan.
Shuningdek, Yakkasaroy tumanida o‘tkazilgan tadbirda 2001-yilda tug‘ilgan “narkoshop” administratori hamda uning 1998-yilda tug‘ilgan sherigi qo‘lga olinib, ularda alfa-PVP, tropikamid va giyohvandlik vositalarini iste’mol qilishda foydalaniladigan moslamalar borligi aniqlangan.
Qibray tumanida esa 2005-yilda tug‘ilgan qiz yashayotgan xonadondan tropikamid dori vositalari topilgan. Bundan tashqari, muqaddam sudlangan internet narko-do‘kon operatorining uyidan 80 gramm alfa-PVP, mefedron, suyuq holatdagi alfa-PVP, pregabalin, elektron tarozi, zip-paket va magnitlar topilib, dalil sifatida hujjatlashtirilgan.
Tezkor kuzatuv davomida ushbu xonadondan chiqib kelayotgan 2004 va 2006-yilda tug‘ilgan ikki nafar talaba yonida tarqatish uchun tayyorlangan 30 dona alfa-PVP moddasi borligi qayd etilgan.
Mazkur holat yuzasidan O‘zbekiston Respublikasi Jinoyat kodeksining 273-moddasi 5-qismi bilan hamda 251-prim 1-moddasi 2-qismi bilan jinoiy ish qo‘zg‘atilgan.
