O‘zbekistonda 35 kilogrammdan ortiq giyohvand moddalar kontrabandasi fosh etildi
Qo‘shni davlatlardan giyohvand moddalar olib kirmoqchi bo‘lgan shaxslar ushlandi.
O‘zbekistonda 35 kilogrammdan ortiq giyohvandlik vositalarining noqonuniy aylanmasiga chek qo‘yildi. Bu haqda DXX xabar berdi.
Ma’lum qilinishicha, Toshkent viloyatida DXX Chegara qo‘shinlari harbiy xizmatchilari hamda hududiy boshqarma xodimlari hamkorligida o‘tkazilgan tezkor tadbirda 2003 va 1998-yillarda tug‘ilgan ikki nafar fuqaro davlat chegarasini noqonuniy kesib o‘tgan vaqtida qo‘lga olingan.
Ularning yonida bo‘lgan ikki dona sport sumkasidan 4 kg 884 gramm “opiy”, 19 kg 863 gramm “gashish” moddalari, shuningdek 380 quti “Esse Change” nomli tamaki mahsulotlari aniqlanib, ashyoviy dalil sifatida rasmiylashtirib olingan.
Mazkur holat yuzasidan gumonlanuvchilarga nisbatan Jinoyat kodeksining 223, 246 va 273-moddalari bilan jinoyat ishi qo‘zg‘atilib, “qamoq” ehtiyot chorasi qo‘llanilgan.
Shuningdek, Surxondaryo viloyatida o‘tkazilgan tezkor-qidiruv tadbirlari davomida Afg‘onistondan kontrabanda yo‘li bilan olib kirilgan giyohvandlik vositalari ham fosh etilgan.
Xabarga ko‘ra, 1978, 1981 va 2004-yillarda tug‘ilgan uch nafar shaxs davlat chegarasini buzgan holda, avtomobil g‘ildiragi kamerasi yordamida Amudaryo orqali suzib o‘tayotgan vaqtda ushlangan.
Tekshiruv jarayonida ularning yonida bo‘lgan xaltalardan 2 kg 708 gramm “opiy” va 8 kg 257 gramm “gashish” moddalari topilgan.
Aniqlanishicha, mazkur shaxslarga giyohvandlik vositalarini manzilga yetkazib berish evaziga har bir kilogramm uchun 200 AQSH dollari miqdorida haq va’da qilingan.
Holat yuzasidan ushbu shaxslarga nisbatan Jinoyat kodeksining 223 va 246-moddalari bilan jinoyat ishi qo‘zg‘atilib, “qamoq” ehtiyot chorasi qo‘llanilgan. Ayni paytda tergov harakatlari davom etmoqda.
