AQSh va Eron ikki haftalik sulhga erishdi
Eron sulh vaqtida Ho‘rmuz bo‘g‘ozida kemalar harakati ta’minlanishini bildirdi.
AQSh va Eron ikki haftalik o‘t ochishni to‘xtatish bo‘yicha kelishuvga erishdi. Bu haqda AQSh prezidenti Donald Tramp ma’lum qildi.
CNN ma’lumotiga ko‘ra, sulh e’lon qilinganiga qaramay, Fors ko‘rfazi mintaqasi hamda Isroil hududlarida raketa hujumlari qayd etilgan. AQSh harbiylari Eronga qarshi zarbalarni vaqtincha to‘xtatgan.
Avvalroq Oq uy yuqori martabali rasmiysi CNN telekanaliga: “Isroil ham sulhga aloqador va muzokaralar davom etar ekan, bombardimon kampaniyasini to‘xtatishga ham rozi bo‘ldi” — degan.
Eron tashqi ishlar vazirining bayonotiga ko‘ra, sulh davomida mamlakat harbiylari strategik ahamiyatga ega bo‘lgan Ho‘rmuz bo‘g‘ozi orqali kemalar harakatini muvofiqlashtiradi. AQSh prezidenti ushbu bo‘g‘ozning qayta ochilishi kelishuvning asosiy shartlaridan biri bo‘lganini ta’kidladi.
Shuningdek, Pokiston bosh vaziri Eron va AQSh delegatsiyalarini juma kuni Islomobodda muzokaralar o‘tkazishga taklif qilgan. Avvalroq Pokiston tomoni diplomatik jarayonlarga imkon yaratish maqsadida ikki haftalik sulh tashabbusi bilan chiqqan edi.
Tramp Eron tomonidan taklif qilingan 10 bandlik rejani muzokaralar olib borish uchun amaliy asos deb hisoblanishini qo‘shimcha qildi.
