Qalbaki hujjatlar orqali 2 milliard so‘m QQSni qaytarish holati fosh etildi

Davlat xavfsizlik xizmati hamda Iqtisodiy jinoyatlarga qarshi kurashish departamenti xodimlari tomonidan Chirchiq shahrida o‘tkazilgan tezkor tadbir davomida yirik miqdordagi soliq firibgarligiga chek qo‘yildi. Bu haqda DXX xabar berdi.

 

Ma’lumotlarga ko‘ra, Toshkent viloyatida faoliyat yurituvchi mas’uliyati cheklangan jamiyatning muqaddam sudlangan xodimi Navoiy viloyatidagi xususiy korxona ish boshqaruvchisining ishonchiga kirib, 2025–2026-yillarda go‘yoki 20 mlrd so‘mlik tovar aylanmasi amalga oshirilgani haqida qalbaki hujjatlar tayyorlashni taklif qilgan. U soliq idoralaridagi tanishlari orqali korxonaga byudjetdan 2 mlrd so‘m qo‘shilgan qiymat solig‘ini qaytarib berishni va’da qilib, bu “xizmat” uchun 340 mln so‘m talab qilgan.

 

Ma’lum bo‘lishicha, mazkur sxemada uning sherigi — Andijon shahrida yashovchi yakka tartibdagi tadbirkor ham ishtirok etgan. U tanish korxona va Navoiydagi xususiy korxona o‘rtasida soxta elektron shartnoma rasmiylashtirib, qiymati 18 mlrd 670 mln so‘mlik qurilish-montaj ishlari, transport xizmatlari va qurilish materiallari yetkazib berilgani haqida 10 ta qalbaki elektron hisob-faktura tayyorlagan. Shu orqali 2 mlrd so‘m QQSni qaytarishga erishilgan.

 

Tezkor tadbir davomida gumonlanuvchilar talab qilingan pul mablag‘ini o‘z jinoiy sheriklari orqali olayotgan vaqtda qo‘lga olingan. 

 

Ular Qibray tumani va Andijon shahrida yashovchi, muqaddam bir necha bor sudlangan shaxslar ekani aniqlangan. Aniqlanishicha, ushbu shaxslar talab qilingan 340 mln so‘ o‘zaro taqsimlab olishlari kerak bo‘lgan.

 

Hozirda mazkur holat yuzasidan to‘rt nafar shaxsga nisbatan Jinoyat kodeksining tegishli moddalari bilan jinoyat ishi qo‘zg‘atilgan. 

 

Tergov harakatlari davom etmoqda, shu jumladan, ushbu noqonuniy sxemaga aloqador bo‘lgan soliq idoralari xodimlarini aniqlash ishlari olib borilmoqda.