Toshkent aeroportida yo‘lovchining pulini o‘g‘irlagan chet ellik ushlandi
U jabrlanuvchini chalg‘itib, pul mablag‘larini yashirin ravishda olib qo‘ygan.
“Islom Karimov” nomidagi Toshkent xalqaro aeroportida yo‘lovchining 9000 AQSH dollarini o‘g‘irlagan shaxs qo‘lga olindi. Bu haqda Transport va turizm obyektlarida xavfsizlikni ta’minlash departamenti xabar berdi.
Ma’lum qilinishicha, 4-aprel kuni 1994-yilda Jizzax viloyatida tug‘ilgan fuqaro 102-sonli Nyu-York–Toshkent yo‘nalishidagi aviareys orqali O‘zbekistonga yetib kelgan. U o‘z yukini tekshirish jarayonida hamyonidan jami 9000 AQSH dollari miqdoridagi pul mablag‘lari yo‘qolganini aniqlagan va zudlik bilan bu haqda shu yerning o‘zida xizmat olib borayotgan patrul-post xizmati xodimiga xabar bergan. Xabar asosida xodimlar qidiruv o‘tkazib, pul mablag‘larini va ularni olgan shaxsni topgan.
“Nyu-York–Toshkent yo‘nalishi bo‘yicha samolyotda uchib keldim va samolyotda registratsiyadan o‘tgan vaqtimda mana shu barsetkamda menga tegishli bo‘lgan 9000 AQSH dollari bo‘lgan pul yo‘qligini sezdim va o‘sha vaqtning o‘zida post-patrul xodimiga murojaat qildim. U xodim tezkor tadbirlar, choralari bilan shu pulimni topib berishdi. Ichki ishlar xodimlariga katta rahmat aytaman” — deydi fuqaro.
Aniqlanishicha, ushbu reysda birga parvoz qilgan 1982-yilda tug‘ilgan chet el fuqarosi bo‘lgan shaxs jabrlanuvchini chalg‘itgan holda uning 9000 AQSH dollari miqdoridagi pul mablag‘larini yashirin ravishda o‘g‘irlab olgan.
Ushbu shaxs samolyot ichida 9000 AQSH dollariga ko‘zi tushganini va ularni olib hamyoniga qo‘shib qo‘yganini bildirib, afsusdaligini aytgan.
