Toshkentda 6,7 milliard so‘mlik kripto-aktivlarni noqonuniy o‘zlashtirgan shaxs ushlandi
Gumonlanuvchi telefonida turli akkauntlar orqali katta miqdorda kripto-aktivlar aylanmasi bilan shug‘ullangan.
Toshkent shahri Yashnobod tumanida litsenziyasiz kriptovalyuta aylanmasi bilan shug‘ullangan shaxs ushlandi. Bu haqda Toshkent shahar IIBB xabar berdi.
Ma’lum qilinishicha, tekshiruvlar jarayonida 2004-yilda Sirdaryo viloyatida tug‘ilgan, hozirda Toshkent shahrida yashovchi fuqaroning iPhone 15 Pro rusumli telefoni xolislar ishtirokida ko‘zdan kechirilgan. Unda fuqaro smartfoniga o‘rnatilgan ilovalar va turli akkauntlar orqali katta miqdorda kriptoaktivlar aylanmasi bilan shug‘ullangani aniqlangan.
Jumladan, gumonlanuvchi P2P orqali noqonuniy kirim-chiqim operatsiyalari yordamida jami 556 100 USDTdan ko‘proq mablag‘ni o‘zlashtirgan. Mazkur summa 6 milliard 700 million so‘mdan ziyodni tashkil etadi.
Fuqaro tergov jarayonida qilgan ishidan pushaymonligini bildirgan va kelgusida bunday faoliyat bilan shug‘ullanmasligini ma’lum qilgan.
Hozirda mazkur holat yuzasidan O‘zbekiston Respublikasi Jinoyat kodeksining 278-prim 8-moddasi bilan jinoyat ishi qo‘zg‘atilgan, gumonlanuvchiga nisbatan qamoqqa olish ehtiyot chorasi qo‘llanilgan. Tergov ishlari davom etmoqda.
