Nazarboyevning qizlari Qozog'istonning eng boy ayollari ro'yxatida yetakchisi — Forbes reytingi
Reytingda birinchi o‘rinni 5,4 milliard dollar bilan Dinara Kulibayeva egallagan.
Forbes Women Kazakhstan Qozogʻistondagi eng badavlat ayollar reytingini e’lon qildi. Mazkur ro‘yxat mamlakatdagi 25 nafar eng boy ayolni qamrab olib, ularning umumiy boyligi taxminan 8,1 milliard dollarni tashkil etadi.
Tahlillarga ko‘ra, kapitalning taqsimoti yuqori darajada konsentratsiyalashgan: umumiy boylikning yarmidan ko‘prog‘i bitta ishtirokchiga to‘g‘ri keladi, eng boy besh nafar ayol esa jami mablag‘larning qariyb 87 foizini nazorat qiladi.
Reytingda birinchi o‘rinni Dinara Kulibayeva egalladi — uning boyligi 5,4 milliard dollarga baholanmoqda. U bank sektori, xususan, Halyk Bankdagi ulushi hamda tijorat ko‘chmas mulk aktivlari orqali yetakchi pozitsiyani saqlab kelmoqda.
Keyingi o‘rinlarda Muqadasxon Ibragimova (650 million dollar), Dariga Nazarboyeva (550 million dollar), Angela Sarsenova (249 million dollar) va Aizhan Yesim (207 million dollar) qayd etilgan.
Shuningdek, reytingda Nursulton Nazarboyevning qizlari yuqori o‘rinlarni egallagani e’tiborni tortadi.
Mutaxassislar ta’kidlashicha, ayollar boyligining 85–90 foizi oilaviy biznes, meros yoki yirik kompaniyalardagi ulushlar orqali shakllangan. Shu bilan birga, zamonaviy tendensiya sifatida ko‘plab ishtirokchilar nafaqat aksiyador, balki faol boshqaruvchi sifatida ham yangi biznes yo‘nalishlarini rivojlantirib, iqtisodiy diversifikatsiyaga hissa qo‘shmoqda.
Reytingga moliya, sanoat, agrobiznes, chakana savdo, media va ko‘chmas mulk kabi turli sohalar vakillari kiritilgan bo‘lib, bu Qozog‘iston iqtisodiyotida ayollar rolini kengayib borayotganini ko‘rsatadi.
