OpenAI va ChatGPT AQShdagi otishma ishi bo‘yicha sudga tortilishi mumkin
Otishmada halok bo‘lgan talabadan birining oilasi hujumchi chatbotdan maslahat olganini da’vo qilmoqda.
AQShda OpenAI va uning sun’iy intellekt mahsuloti ChatGPT Florida shtatidagi universitetda sodir bo‘lgan otishma bilan bog‘liq ish yuzasidan sudga tortilishi mumkin. Bu haqda The Times xabar berdi.
Ma’lum qilinishicha, Florida universitetida o‘tgan yil aprel oyida yuz bergan otishma oqibatida ikki kishi halok bo‘lgan, yana besh kishi jarohat olgan. Hujumni talaba Feniks Eichner sodir etgan. U hozirda hibsda bo‘lib, sud jarayoni joriy yil oktabr oyiga rejalashtirilgan.
Halok bo‘lganlardan biri — Robert Moralesning oilasi hujumchi otishmadan oldin ChatGPT bilan muntazam muloqotda bo‘lganini va undan maslahat olgan bo‘lishi mumkinligini da’vo qilmoqda. Shu asosda ular OpenAI kompaniyasini ham sudga berishni rejalashtirmoqda.
Kompaniya vakillari esa ushbu voqea yuzasidan huquqni muhofaza qiluvchi organlar bilan to‘liq hamkorlik qilinayotganini bildirgan.
