Qirgʻizistonda qalbaki pul ishlab chiqaruvchi xalqaro guruh fosh etildi
Maxsus operatsiya davomida Oʻzbekiston va Qirgʻiziston fuqarolari qoʻlga olingan.
Qirgʻizistonda qalbaki pul ishlab chiqarish va tarqatish bilan shugʻullangan xalqaro jinoiy guruh faoliyati fosh etildi. Bu haqda Qirgʻiziston Davlat Milliy xavfsizlik qoʻmitasi (GKNB) ga tayanib Open.kg xabar berdi.
Rasmiy axborotga koʻra, mazkur guruh bir nechta davlat hududida faoliyat yuritib, yuqori sifatli qalbaki banknotalarni tayyorlash va ularni murakkab taqsimot tarmogʻi orqali realizatsiya qilish bilan shugʻullangan.
Oʻtkazilgan maxsus operatsiya davomida Oʻzbekiston va Qirgʻiziston fuqarolari nazorat ostidagi “sinov xaridi” jarayonida qoʻlga olingan. Tintuvlar davomida katta miqdorda qalbaki xorijiy valyuta hamda ishga aloqador boshqa ashyoviy dalillar musodara qilingan.
Mazkur holat yuzasidan Qirgʻiziston Jinoyat kodeksining 233-moddasi bilan jinoiy ish qoʻzgʻatilib, gumonlanuvchilar GKNB tergov hibsxonasiga joylashtirilgan.
Hozirda huquqni muhofaza qiluvchi organlar tomonidan ushbu jinoiy tarmoqning barcha ishtirokchilarini aniqlash, shuningdek, qalbaki pullarni tarqatish kanallarini fosh etish boʻyicha tezkor-qidiruv va tergov harakatlari davom ettirilmoqda.
