Oʻzbekiston va Qozogʻiston Prezidentlari Buxoroning tarixiy merosi bilan tanishdilar
Tashrif davomida Prezidentlarga tarixiy yodgorliklar va hunarmandchilik namunalari namoyish etildi.
Oʻzbekiston Prezidenti Shavkat Mirziyoyev va Qozogʻiston Prezidenti Qasim-Jomart Toqayev Buxoro shahriga tashrif doirasida uning boy tarixiy-madaniy merosi bilan yaqindan tanishdilar.
Davlat rahbarlari qadimiy Buxoroning dunyoga mashhur yodgorliklari – Ark qoʻrgʻoni, Poi Kalon va Labi Hovuz majmualarini ziyorat qildilar.
Tashrifning dastlabki manzili bo‘lgan Ark qal'asi asrlar davomida Buxoroning siyosiy va maʼmuriy markazi sifatida xizmat qilgan. Mazkur tarixiy obida bugungi kunda UNESCOning Butunjahon merosi roʻyxatiga kiritilgan Buxoro tarixiy markazining muhim qismi hisoblanadi.
Shundan soʻng yetakchilar Markaziy Osiyoning eng yirik meʼmoriy majmualaridan biri — Poi Kalon ansambliga tashrif buyurdilar. 1127-yilda bunyod etilgan Kalon minorasi, Kalon masjidi va Mir Arab madrasasini oʻz ichiga olgan ushbu majmua Buxoroning tarixiy qiyofasini belgilovchi asosiy obidalardan biridir.
Labi Hovuz majmuasi ham oliy martabali mehmonlarda katta taassurot qoldirdi. Koʻkaldosh va Nodir Devonbegi madrasalari hamda xonaqohdan iborat ushbu hudud asrlar davomida ilm-fan, madaniyat va savdo markazi sifatida mashhur boʻlib kelgan.
Tashrif davomida mehmonlarga Buxoroning Buyuk ipak yoʻlidagi oʻrni, uning islom sivilizatsiyasi, ilm-fan va madaniyat rivojiga qoʻshgan hissasi haqida batafsil maʼlumot berildi. Shuningdek, xalq hunarmandchiligi va anʼanaviy bezak sanʼati namunalarining oʻziga xosligi namoyish etildi.
Taʼkidlash joizki, Buxoro butun mintaqa uchun muhim maʼnaviy-maʼrifiy makon ham edi. Bu yerda oʻz vaqtida qozoq ziyolilari va maʼrifatparvarlarining koʻplab taniqli namoyandalari tahsil olgan, bu esa xalqlarimiz umumiy tarixiy-madaniy merosining alohida sahifasini tashkil etadi. Xususan, qozoq adabiyoti, maʼnaviyati va ijtimoiy tafakkuri rivojiga sezilarli hissa qoʻshgan Mashhur Jusup Koʻpeyev, Nurjon Naushabayev, Shortanbay Qanay oʻgʻli, Sultonmahmut Toʻraygʻirov va boshqalarning nomlari Buxoro madrasalari bilan bogʻliq.
