Uchtepadagi yong‘in ortida qotillik: ayol qasddan o‘ldirilgani ma’lum bo‘ldi
Yong‘indan so‘ng uchta alohida yong‘in o‘chog‘i va qasddan o‘t qo‘yish alomatlari aniqlangan.
Toshkent shahrining Uchtepa tumanida xonadonlardan birida sodir bo‘lgan yong‘inda halok bo‘lgan ayol qasddan o‘ldirilgani ma’lum bo‘ldi. Bu haqda Bosh prokuratura matbuot kotibi Hayot Shamsutdinov Zamon.uz’ga ma’lum qildi.
2026-yil 24-oktyabr kuni soat 02:00 larda Uchtepa tumanidagi xonadonlardan birida yong‘in sodir bo‘lgan. Hodisa joyida ushbu xonadonda yashagan, 2000-yil 30-mayda tug‘ilgan ayolning jasadi aniqlangan. Uning tanasida yelka qismidan son-oyoq sohasigacha termik jarohatlar bo‘lgan.
Tekshiruv davomida oshxona, yotoqxona va mehmonxonada bir-biriga bog‘liq bo‘lmagan uchta yong‘in o‘chog‘i, shuningdek, qasddan o‘t qo‘yish alomatlari aniqlangan.
Mazkur holat yuzasidan 24-oktyabr kuni Uchtepa tumani prokuraturasi tomonidan Jinoyat kodeksining 97-moddasi 1-qismi — qasddan odam o‘ldirish bilan jinoyat ishi qo‘zg‘atilgan.
Hozirda dastlabki tergov harakatlari olib borilmoqda. Tergov natijalariga ko‘ra qonuniy qaror qabul qilinishi va qo‘shimcha axborot berilishi ma’lum qilingan.
