Shavkat Mirziyoyev “Eldridge Industries” kompaniyasi bosh direktorini qabul qildi
O‘zbekiston va AQShning ushbu kompaniyasi ko‘p qirrali hamkorlikni rivojlantirish bo‘yicha qo‘shma “yo‘l xaritasi”ni qabul qilishga kelishib oldi.
Prezident Shavkat Mirziyoyev 23-oktabr kuni AQShning “Eldridge Industries” kompaniyasi hammuassisi, raisi va bosh ijrochi direktori Todd Boelini qabul qildi.
Uchrashuvda AQShning mazkur yetakchi korporatsiyasi bilan yirik kooperatsiya loyihalarini amalga oshirish istiqbollari koʻrib chiqildi.
Davlat rahbari hamkorlikning ustuvor yo‘nalishlarini belgilab berdi. Xususan, tog‘-kon sanoati, metallurgiya va qurilish sohalarida sheriklikni kengaytirish, shuningdek, shahar infratuzilmasiga zamonaviy raqamli yechimlarni joriy etish masalalariga e’tibor qaratildi.
Muzokaralar yakunida tomonlar ko‘p qirrali hamkorlikni yanada rivojlantirishga qaratilgan qo‘shma “yo‘l xaritasi”ni qabul qilishga kelishib oldi.
“Eldridge Industries” aktivlarni boshqarish, sug‘urta, ko‘chmas mulk, infratuzilma, texnologiyalar, sport va media sohalarida faoliyat yuritadigan AQSh investitsiyaviy xoldingidir. Kompaniya boshqaruvidagi aktivlarning umumiy qiymati 75 milliard dollardan oshadi.
