Andijonda iqlimga mos suv ta’minoti loyihasi bo‘yicha jamoatchilik eshituvi o‘tkazildi
Mazkur loyiha Osiyo taraqqiyot banki ishtirokida moliyalashtirilmoqda.
Andijon viloyatida aholini toza ichimlik suvi bilan ta’minlash hamda kanalizatsiya xizmatlarini yaxshilashga qaratilgan yirik loyiha doirasida jamoatchilik eshituvi o‘tkazildi.
Mazkur loyiha Osiyo taraqqiyot banki ishtirokida moliyalashtirilib, O‘zbekiston Prezidentining 2022-yil 24-maydagi 257-son qarori ijrosi doirasida amalga oshirilmoqda. U “Iqlim sharoitiga mos suv ta’minoti va kanalizatsiya xizmatlarini ko‘rsatish” dasturi asosida hayotga tatbiq etilmoqda.
Jamoatchilik eshituvida mahalliy aholi vakillari, fuqarolar yig‘inlari raislari, davlat tashkilotlari mutasaddilari, ekologik tashkilotlar hamda loyiha tashabbuskorlari ishtirok etdi.
Tadbir davomida loyihaning asosiy maqsad va vazifalari, amalga oshirish bosqichlari hamda atrof-muhitga ehtimoliy ta’siri yuzasidan batafsil ma’lumotlar taqdim etildi. Shuningdek, qurilish jarayonida ekologik xavflarni kamaytirish bo‘yicha ko‘zda tutilgan chora-tadbirlar muhokama qilindi.
Mutaxassislar tomonidan ichimlik suvi ta’minoti va kanalizatsiya tizimini rivojlantirishga doir rejalashtirilgan ishlar yuzasidan taqdimotlar o‘tkazildi. Loyiha doirasida aholi uchun qulayliklar yaratish, sanitariya holatini yaxshilash hamda ekologik barqarorlikni ta’minlash ustuvor yo‘nalishlar sifatida qayd etildi.
Eshituv jarayonida fuqarolar tomonidan bildirilgan taklif va mulohazalar inobatga olinib, loyihani amalga oshirishda ochiqlik va shaffoflikni ta’minlashga alohida e’tibor qaratildi.
Ta’kidlanishicha, bunday tashabbuslar aholi salomatligini mustahkamlash, turmush darajasini oshirish hamda zamonaviy infratuzilmani rivojlantirishda muhim ahamiyat kasb etadi.
