Tramp o‘zini “shifo beruvchi avliyo” qiyofasida tasvirlangan suratini e’lon qildi
Sun’iy intellekt yordamida yaratilgan ushbu surat Tramp Rim Papasining tinchlik haqidagi bayonotlarini tanqid qilganidan so‘ng joylandi.
AQSh prezidenti Donald Tramp ijtimoiy tarmoqda o‘zini “shifo beruvchi avliyo” qiyofasida tasvirlangan suratini e’lon qildi. Tramp ushbu tasvirga hech qanday izoh yoki sarlavha qo‘shmagan.
DW xabariga ko'ra, rasmni joylashdan avval, Tramp o‘zining Truth Social platformasida Papa Leo XIV ni keskin tanqid qilgan. Papa diniy marosim chog‘ida “muzokara stoliga o‘tirish kerak, o‘limga olib keluvchi qarorlar qabul qilinadigan stolga emas” degan mazmundagi chaqiriq bilan chiqish qilgan edi. Bunga javoban Tramp papa siyosiy masalalarda “yomon” ekanini aytgan.
“Men Eronning yadroviy qurolga ega bo‘lishi normal holat deb hisoblaydigan papaga muhtoj emasman. Men Venesuelaga qarshi AQSh hujumini qoralaydigan papaga muhtoj emasman, ayni paytda bu mamlakat AQShga katta miqdorda giyohvand moddalar yuboradi va bundan ham yomoni, o‘z qamoqxonalaridagi mahbuslarni — jumladan qotillar, narkotik savdogarlari va jinoyatchilarni — bizning mamlakatimizga chiqarib yuboradi. Men esa meni saylangan vazifamni bajarayotganim uchun tanqid qiladigan papaga ham muhtoj emasman”, — deb yozdi Donald Tramp.
Prezidentning fikricha, Papa Leo XIV undan minnatdor bo‘lishi kerak, chunki u faqat amerikalik bo‘lgani uchun papa etib saylangan.
“Agar men Oq uyda bo‘lmaganimda, Leo Vatikanda bo‘lmas edi”, — deya qo‘shimcha qildi u.
Shuningdek, Donald Trump Rim papasini sog‘lom fikr yuritishga va siyosatchi emas, Papa bo‘lishga chaqirdi.
11-aprel kuni butun dunyo tinchligi uchun o‘tkazilgan ibodat marosimida, ilk marta AQShdan saylangan Papa Leo XIV cherkov har doim tinchlikka chaqirishini ta’kidlagan edi.
