Surxondaryoda YTH sodir etib, dugonasining o‘limiga sabab bo‘lgan qiz qamaldi
Haydovchi tezlikni oshirib, avtomobil boshqaruvini yo‘qotgani oqibatida transport vositasi yo‘ldan chiqib, daryoga tushib ketgan.
Surxondaryo viloyatida yuz bergan yo‘l-transport hodisasida talaba qiz vafot etgani yuzasidan sud hukmi o‘qildi.
Ma’lum qilinishicha, 2025-yil 23-noyabr kuni soat 15:40 atrofida Toshkentdagi oliy ta’lim muassasalaridan birining 4-bosqich talabasi o‘ziga tegishli, biroq hujjatlari rasmiylashtirilmagan Cobalt avtomobilida Sherobod–Toshkent yo‘nalishi bo‘ylab harakatlangan.
U uzoq safarga yolg‘iz chiqmaslik maqsadida o‘zi bilan bir oliygohda o‘qiydigan tanishini ham olib ketgan. Harakatlanish davomida haydovchi tezlikni oshirib yuborib, avtomobil boshqaruvini yo‘qotgan. Natijada transport vositasi yo‘ldan chiqib, Sherobod daryosiga tushib ketgan.
YTH oqibatida avtomobilda yo‘lovchi sifatida bo‘lgan talaba qiz og‘ir tan jarohatlari olib, voqea joyida vafot etgan.
Sud hukmiga ko‘ra, haydovchi Jinoyat kodeksining 266-moddasi ikkinchi qismi bo‘yicha aybli deb topildi.
Unga barcha turdagi transport vositalarini boshqarish huquqidan 3 yilga mahrum etish hamda 1 yil 6 oy muddatga ozodlikdan mahrum qilish jazosi tayinlandi.
