O‘zbekiston Belarusdan 4 ming gektar ekin maydonini ijaraga oladi
Ushbu yer maydonida ming bosh qoramol parvarishlash rejalashtirilgan.
Qashqadaryo viloyati delegatsiyasining Belarusga amalga oshirgan tashrifi doirasida qator muhim iqtisodiy va gumanitar kelishuvlarga erishildi. Bu haqda “Dunyo” axborot agentligi xabar berdi.
Ma’lum qilinishicha, tashrif davomida O‘zbekiston vakillari Belarusning Vitebsk viloyatida joylashgan Braslav, Shumilin, Postav kabi hududlardagi chorvachilik komplekslari hamda savdo obyektlari faoliyati bilan tanishgan. Shuningdek, Vitebsk viloyati ijroiya qo‘mitasi rahbariyati bilan o‘tkazilgan uchrashuvlarda iqtisodiy hamkorlikni yanada rivojlantirish va qo‘shma ishlab chiqarish zanjirlarini shakllantirish masalalari muhokama qilingan.
Tashrif doirasida “Asl Yuksalish Savdo” va “Muborak qorako‘lchilik” korxonalari hamda Shumilin tumanidagi “Sirotinskiy” chorvachilik fermasi vakillari bilan uchrashuvlar o‘tkazilib, o‘zaro manfaatli hamkorlikni yo‘lga qo‘yish bo‘yicha kelishuvlarga erishildi.
Erishilgan kelishuvlarga ko‘ra, O‘zbekiston tomoni Belarus hududida 4 ming gektar ekin maydonini uzoq muddatli ijaraga oladi. Ushbu yer maydonida yirik agrar loyihani amalga oshirish rejalashtirilgan bo‘lib, uning birinchi bosqichida 1 ming bosh qoramol parvarishlash ko‘zda tutilgan.
Shu bilan birga, eksport yo‘nalishida ham sezilarli natijalarga erishildi. Jumladan, “Asl Yuksalish Savdo” korxonasi Belarusning yirik savdo tarmoqlaridan biri — “Dobronom” yopiq aksiyadorlik jamiyati bilan shartnoma imzoladi.
Ushbu shartnomaga muvofiq, O‘zbekistondan Belarusga har yili 60 ming tonna qishloq xo‘jaligi mahsulotlari yetkazib beriladi. Eksport tarkibiga quruq mevalar, dukkakli ekinlar, poliz mahsulotlari hamda uzum kiritiladi.
Iqtisodiy hamkorlik bilan bir qatorda, gumanitar aloqalarni rivojlantirishga ham alohida e’tibor qaratildi. Xususan, turistik sohada hamkorlikni kuchaytirish maqsadida ikki mamlakat turizm vakillari uchun o‘zaro tanishuv safarlarini tashkil etishga kelishib olindi.
Shuningdek, Belarus Kasaba uyushmalari federatsiyasi rahbari Yuriy Senko bilan o‘tkazilgan uchrashuvda Qashqadaryo viloyati teatri jamoasining Minsk sahnalarida spektakllar namoyish etishi tashabbusi qo‘llab-quvvatlandi.
