Avstraliya mehnat bozoriga yo‘l ochilmoqda: o‘zbekistonlik mutaxassislar ishga jalb etilishi mumkin
Avstraliyaning Shimoliy hududi vakillari bilan o‘zbekistonlik malakali ishchilarni jalb qilish bo‘yicha muzokaralar o‘tkazildi.

Avstraliya O‘zbekistondan malakali ishchilarni jalb qilishga qiziqish bildirmoqda. Bu haqda “Dunyo” axborot agentligi xabar berdi.
O‘zbekiston Tashqi ishlar vazirligi tashabbusi va mamlakatning Singapurdagi elchixonasi ko‘magida Avstraliyaning Shimoliy hududi vakillari bilan videokonferensiya shaklida muzokaralar o‘tkazildi.
Uchrashuvda o‘zbekistonlik mutaxassislarni Avstraliyada ish bilan ta’minlash imkoniyatlari muhokama qilindi. Xususan, Avstraliyaning malakali ishchi kuchiga, jumladan, neft va gaz sanoatidagi kadrlarga bo‘lgan ehtiyoji ko‘rib chiqildi.
Shuningdek, O‘zbekiston fuqarolarini uyushgan va qonuniy asosda ishga joylashtirish, ularning kasbiy hamda til tayyorgarligini xalqaro talablarga moslashtirish va amaliy hamkorlikni yo‘lga qo‘yish masalalari yuzasidan fikr almashildi.
Tomonlar ikki mamlakat fuqarolarining huquqlarini himoya qilish mexanizmlarini ishlab chiqish maqsadida dastlabki konsullik maslahatlashuvlarini o‘tkazish masalasini ham ko‘rib chiqishga kelishib oldilar.
Muzokaralarda Migratsiya agentligi va Kasbiy ta’lim agentligi vakillari ham ishtirok etib, O‘zbekistonning inson resurslari salohiyatini taqdim etdi.








