AQSh armiyasi 12 yildan so‘ng Suriyadan chiqib ketdi

AQSh Qurolli kuchlari Suriyaning Hasaka viloyatida joylashgan Qasrak aviabazasidan o‘z qo‘shinlari va harbiy texnikasini to‘liq olib chiqib ketdi. Bu haqda har ikki tomon rasmiylari ma’lum qildi, deya xabar bermoqda AP.

 

 

Qayd etilishicha, payshanba kuni harbiy xizmatchilar va texnika ortilgan so‘nggi karvon bazani tark etgan.

 

Natijada Suriya armiyasi AQSh harbiylari ilgari joylashgan hududlardagi deyarli barcha harbiy obyektlar ustidan to‘liq nazoratni qo‘lga olgan.

 

Suriya Tashqi ishlar vazirligi bu jarayonni mamlakat suverenitetining tiklanishi bilan izohladi. Bayonotda qayd etilishicha, shimoli-sharq va chegara hududlarining markaziy hukumat nazoratiga qaytishi davlatni birlashtirish bo‘yicha sa’y-harakatlar natijasidir.

 

Rasmiy ma’lumotlarga ko‘ra, AQSh qo‘shinlarining chiqib ketishi Damashq hukumati va kurdlar boshchiligidagi Suriya Demokratik Kuchlari o‘rtasidagi kelishuvlar hamda “IShID” guruhiga qarshi kurashdagi natijalar bilan bog‘liq.

 

Tim Havkins AQSh Markaziy qo‘mondonligi nomidan chiqib ketish jarayoni yakunlanganini tasdiqladi. Uning aytishicha, jarayon “reja asosida va shartlarga muvofiq” amalga oshirilgan. Shu bilan birga, AQSh harbiylari mintaqada terrorizmga qarshi kurash bo‘yicha hamkorlikni davom ettirishini bildirgan.

 

 

AQSh qo‘shinlarining chiqishi fevral oyidan boshlangan bo‘lib, avvalroq al-Tanf bazasi ham topshirilgan edi.

 

Shuningdek, AQSh kuchlari Suriyadagi hibs markazlarida saqlangan taxminan 5 700 nafar “IShID”ga aloqador gumonlanuvchilarni Iroqdagi jazoni ijro etish muassasalariga ko‘chirgan.

 

AQSh harbiylarining Suriyadagi asosiy vazifasi “IShID” guruhining qayta kuchayishining oldini olish bo‘lgan. Guruh 2019-yilda o‘zining so‘nggi hududini yo‘qotgan bo‘lsa-da, uning yashirin jamoalari hanuzgacha mintaqada vaqti-vaqti bilan hujumlar uyushtirib kelmoqda.