General Motors va Ford harbiy texnika ishlab chiqarishga qaytishi mumkin
Bunga sabab sifatida AQShning qurol-yarog‘ zaxiralari kamayib borayotgani ko'rsatilmoqda.
AQShning qurol-yarog‘ zaxiralari kamayib borayotgani sababli, Vashington Detroytdagi avtomobil ishlab chiqaruvchilarini harbiy mahsulot ishlab chiqarishga jalb etishni rejalashtirmoqda. Bu haqda Carscoops nashri xabar berdi.
Ma’lumotlarga ko‘ra, taxminan 80 yil avval Detroytning yirik avtomobil kompaniyalari fuqarolik avtomobillari ishlab chiqarishni to‘xtatib, bombardimonchi samolyotlar, tanklar, yuk mashinalari va aviadvigatellar ishlab chiqarishga o‘tgan edi. Ushbu keng ko‘lamli o‘zgarish tufayli soha “Demokratiya arsenali” deb nom olgan.
Endilikda Eron bilan urush cho‘zilayotgani fonida AQSh hukumati Detroytni yana harbiy ishlab chiqarishga qaytishga chaqirmoqda.
The Wall Street Journal yozishicha, Pentagon General Motors (GM), Ford, GE Aerospace va Oshkosh Corporation kompaniyalariga qurol va harbiy texnika ishlab chiqarishda yordam so‘rab murojaat qilgan. Muzokaralarda ushbu kompaniyalarning yuqori lavozimli rahbarlari ishtirok etgan.
Rasmiylar faqat an’anaviy mudofaa pudratchilariga tayanib qolmasdan, yirik hajmda ishlab chiqarish tajribasiga ega kompaniyalarni jalb etish orqali raketalar, o‘q-dorilar, dronlarga qarshi vositalar va boshqa texnikalarni tezroq ishlab chiqarishni ko‘zlamoqda.
Biroq, 1940-yillardan farqli o‘laroq, bugungi kunda krossover avtomobillar ishlab chiqarishdan raketa ishlab chiqarishga o‘tish ancha murakkab jarayon bo‘lishi ta’kidlanmoqda.
