Isroil va Livan vaqtinchalik sulhga erishdi
Hizbulloh ham sulhga qo‘shilishga rozi bo‘lgan va Isroildan qo‘shinlarini olib chiqishni talab qilgan.
Isroil va Livan o‘rtasida o‘t ochishni to‘xtatish kelishuvi kuchga kirdi. Bu haqda AQSh Prezidenti Donald Tramp Isroil Bosh vaziri Binyamin Netanyahu va Livan Prezidenti Jozef Aun bilan muloqotdan so‘ng e’lon qildi.
Ma’lumotlarga ko‘ra, dastlab 10 kun davom etishi rejalashtirilgan kelishuv keyinchalik uzaytirilishi ehtimoli bor. Isroil bosh vaziri Binyamin Netanyahu bu sulh Livan bilan “tarixiy tinchlik bitimi”ga yo‘l ochishi mumkinligini aytdi.
Eron qo‘llovidagi Hizbulloh sulhga rioya qilishga rozi bo‘lgan. Biroq tashkilot butun Livan hududida hujumlar to‘liq to‘xtatilishi va Isroil qo‘shinlari erkin harakatlanmasligini talab qilmoqda.
Netanyahuning aytishicha, Isroil qo‘shinlari Livan janubida 10 kilometr chuqurlikdagi “xavfsizlik zonasi”da qoladi. Lekin bu “Hizbulloh”ning qo‘shinlarni to‘liq olib chiqish talabi bilan mos kelmaydi.
AQSh Davlat departamentiga ko‘ra, kelishuvga muvofiq, Livan hukumati “Hizbulloh”ning Isroilga hujumlarini oldini olish uchun aniq choralar ko‘rishi kerak. Shu bilan birga, mamlakat mudofaasi uchun asosiy mas’uliyat Livan xavfsizlik kuchlariga yuklatiladi.
Sulh kuchga kirishidan oldin Isroil mudofaa kuchlari Livan janubida 380 dan ortiq nishonga zarba berganini ma’lum qildi.
Hozircha kelishuvning keyingi bosqichlari noma’lum. Donald Tramp Isroil va Livan yetakchilarini Oq uyga taklif qilganini bildirgan.
