Qashqadaryoda kadastr xodimi pora bilan ushlandi
Xodim fuqaroga yer maydoni uchun qo‘llanilgan jarimani bekor qilib bermoqchi bo‘lgan.
Qashqadaryoda yer maydonlarini noqonuniy sotish bilan bog‘liq holatlar fosh etildi. Bu haqda DXX xabar berdi.
Ma’lum qilinishicha, Davlat xavfsizlik xizmati viloyat boshqarmasi hamda Iqtisodiy jinoyatlarga qarshi kurashish departamenti xodimlari hamkorligida o‘tkazilgan tadbirda Qarshi tumanidagi Kadastr agentligi bo‘limi yetakchi inspektori ushlangan. U mansabdor tanishlari orqali fuqaro tomonidan noqonuniy egallab olingan 12 sotix yer maydoni uchun qo‘llanilgan 82 mln so‘m jarimani bekor qilish va kadastr hujjatlarini rasmiylashtirish evaziga 2 ming AQSH dollari olgan vaqtida ashyoviy dalillar bilan qo‘lga tushgan.
Shu kabi holat Shahrisabz tumanida ham qayd etildi. Unda muqaddam firibgarlik jinoyati uchun sudlangan 59 yoshli shaxs hamda Davlat kadastrlari palatasi tuman filiali xodimi o‘zaro til biriktirib, mahalliy dehqon xo‘jaligiga tegishli 9 sotix yer maydonini boshqa shaxs nomiga rasmiylashtirib berish evaziga 7 ming AQSH dollari talab qilgan. Ular oldindan 4 ming dollar olgan vaqtda qo‘lga olingan.
Har ikki holat yuzasidan jinoyat ishlari qo‘zg‘atilgan bo‘lib, hozirda tergov harakatlari olib borilmoqda.
