AQShda dahshatli otishma — sakkiz nafar bola halok bo‘ldi
Qurbon bo‘lgan bolalarning yoshi bir yoshdan 14 yoshgacha ekani aytilmoqda.
AQShning Luiziana shtati Shreveport shahrida sodir bo‘lgan dahshatli otishma oqibatida sakkiz nafar bola halok bo‘ldi, yana ikki kishi tan jarohati oldi. Bu haqda mahalliy politsiya NBC News nashriga ma’lum qildi.
Dastlabki ma’lumotlarga ko‘ra, voqea oilaviy mojaro sabab yuz bergan bo‘lishi mumkin. Hodisa bir mahalladagi ikkita uyda sodir bo‘lgan, jabrlanuvchilardan biri esa qochib, yaqin atrofdagi uchinchi uyga yashiringan.
Rasmiylarga ko‘ra, qurolli hujum natijasida jami o‘n kishi jabrlangan. Halok bo‘lgan bolalarning yoshi bir yoshdan 14 yoshgacha bo‘lgani aytilmoqda. Ayrim qurbonlar gumondorning qarindoshlari ekani ham ma’lum qilingan.
Voqeadan so‘ng hujumchi avtomobil o‘g‘irlab qochishga uringan, biroq politsiya tomonidan ta’qib qilinib, maxsus operatsiya davomida otib o‘ldirilgan.
Shreveport shahri meri Tom Arkeno ushbu hodisani shahar tarixidagi eng og‘ir fojialardan biri deb atab, motam e’lon qilinganini bildirgan.
