Saudiya Arabistoni Makkaga kirish qoidalarini kuchaytirdi
Haj vizasiga ega bo‘lgan shaxslardan tashqari, boshqa barcha turdagi vizaga ega fuqarolarning Makkaga kirishi yoki shaharda qolishi taqiqlanadi.
Saudiya Arabistoni rasmiylari ziyoratchilar xavfsizligini ta’minlash hamda Haj mavsumini tartibli o‘tkazish maqsadida Makkaga kirish qoidalarini kuchaytirayotganini ma’lum qildi.
Qirollik Ichki ishlar vazirligi xabariga ko‘ra, bir qator yangi cheklov va tartiblar joriy etilgan.
Qayd etilishicha, 18-apreldan boshlab Haj vizasiga ega bo‘lgan shaxslardan tashqari, boshqa barcha turdagi vizaga ega fuqarolarning Makkaga kirishi yoki shaharda qolishi taqiqlanadi.
Shuningdek, 13-apreldan e’tiboran Makkaga kirishni istagan shaxslar vakolatli organlardan rasmiy ruxsatnoma olishi lozim. Ruxsatsiz shaharga kirishga yo‘l qo‘yilmaydi.
Ma’lum qilinishicha, Makkada berilgan yashash ruxsatnomasi, Haj ruxsatnomasi yoki Absher Individuals hamda Muqeem platformalari orqali elektron shaklda rasmiylashtirilgan va Tasreeh tizimiga integratsiya qilingan ish ruxsatnomasi mavjud shaxslargina shaharga kirishi mumkin bo‘ladi.
Bundan tashqari, Saudiya fuqarolari, Fors ko‘rfazi davlatlari fuqarolari, rezidentlar hamda boshqa vizaga ega shaxslar uchun Nusuk platformasi orqali Umra ruxsatnomalarini berish 18-apreldan 31-maygacha vaqtincha to‘xtatiladi.
Rasmiylar mazkur talablarni buzgan shaxslarga nisbatan amaldagi qonunchilik asosida jazo choralari qo‘llanishini bildirdi.
