Rossiya, Ukraina va AQSh muzokaralari qayerda o‘tkaziladi? Ikki manzil ko‘rib chiqilmoqda
AQSh rasmiysiga ko‘ra, uch tomonlama muzokaralar yaqin ikki hafta ichida o‘tkazilishi mumkin.
Rossiya, Ukraina va AQSh delegatsiyalari o‘rtasidagi navbatdagi muzokaralar yaqin ikki hafta ichida Birlashgan Arab Amirliklari poytaxti Abu-Dabi yoki Shveytsariyada o‘tkazilishi mumkin. Uchrashuvdan ko‘zlangan maqsad uch mamlakat rahbarlari darajasidagi muloqotni tashkil etishdan iborat. Bu haqda Reuters xabar berdi.
Manbaga ko‘ra, muzokaralarning aniq sanasi hozircha belgilanmagan. Rahbarlar darajasidagi uchrashuvni tashkil etish uchun hali muhim masalalarni hal qilish talab etiladi.
Ukraina prezidenti Vladimir Zelenskiy ham 23-oktabr kuni Rossiya, Ukraina va AQSh vakillari noyabr oyining birinchi yarmida Abu-Dabida texnik darajadagi uchrashuv o‘tkazishga kelishib olganini ma’lum qilgan. U uch mamlakat rahbarlari ham uchrashishiga umid bildirgan.
21-oktabr kuni Rossiya prezidenti Vladimir Putin Sankt-Peterburgda AQSh prezidentining maxsus vakili Stiv Uitkoff bilan uchrashdi. Muzokaralarda Ukrainadagi urushni hal qilish masalasi muhokama qilingan.
Uchrashuvdan so‘ng Putin yordamchisi Yuriy Ushakov Rossiya, AQSh va Ukraina o‘rtasidagi uch tomonlama muzokaralarning navbatdagi bosqichi noyabr oyida Abu-Dabida o‘tkazilishi mumkinligini aytdi. Uning ta’kidlashicha, Moskva noyabrning birinchi yarmida muzokaralar jarayonini qayta boshlashga tayyor.
Rossiya prezidenti matbuot kotibi Dmitriy Peskov ham Abu-Dabi uchrashuv o‘tkazish joyi sifatida ko‘rib chiqilayotganini bildirgan. Ushakovning so‘zlariga ko‘ra, Rossiya delegatsiyasi tarkibiga prezident yordamchisi Vladimir Medinskiy va harbiy qo‘mondonlik vakillari kirishi mumkin.
Putin esa AQSh ma’muriyati vakillari bilan uchrashuvlarda Ukraina bo‘yicha uch tomonlama muzokaralarni qayta boshlash masalasida kelishuvga erishilganini tasdiqlagan. Uning aytishicha, muhokamalardan biri tinchlik kelishuvlari imzolangach, Rossiya va Ukraina xavfsizligini ta’minlash masalalariga qaratiladi.
Rossiya, Ukraina va AQSh o‘rtasidagi uch tomonlama muzokaralarning avvalgi bosqichlari 23–24-yanvar, 4–5-fevral hamda 17–18-fevral kunlari bo‘lib o‘tgan. Navbatdagi uchrashuvni 5–8-mart kunlari Abu-Dabida o‘tkazish rejalashtirilgan, biroq AQShning Eronga qarshi operatsiyasi boshlanganidan keyin u qoldirilgan.
Dastlabki ikki raundda Rossiya delegatsiyasiga Bosh shtab Bosh boshqarmasi boshlig‘i Igor Kostyukov rahbarlik qilgan. Jenevada o‘tgan uchinchi bosqichda esa delegatsiyani Vladimir Medinskiy boshqargan.
