Yaqin Sharqdagi keskinlik: AQSh Saudiya Arabistonidagi elchixona xodimlarini olib chiqmoqda

 

AQSh ma’muriyati Yaqin Sharqdagi xavfsizlik vaziyatining keskinlashuvi fonida Saudiya Arabistonidagi elchixonasining ayrim xodimlari va ularning oila a’zolariga mamlakatni tark etish haqida ko‘rsatma berdi. Shuningdek, mintaqadagi boshqa bir qator davlatlarda ham AQSh diplomatik vakolatxonalari xodimlari tarkibiga vaqtinchalik o‘zgartirishlar kiritilmoqda.

 

AFP agentligining diplomatik manbalarga tayanib xabar berishicha, Ar-Riyoddagi AQSh elchixonasining favqulodda bo‘lmagan xodimlari va ularning oila a’zolariga Saudiya Arabistonini tark etish buyurilgan. Shunga o‘xshash ko‘rsatmalar Birlashgan Arab Amirliklari, Iordaniya, Qatar va Bahrayndagi amerikalik diplomatlarning oila a’zolariga ham berilgan.

 

Amerikalik diplomatlarning ayrimlari ko‘chish xarajatlari uchun ajratilayotgan moliyaviy yordam yetarli emasligidan norozilik bildirgan. Ularning aytishicha, ba’zi oilalar farzandlari uchun yangi uy va maktab topishga ulgurmasdan yana evakuatsiyaga tayyorlanmoqda.

 

Amerika Tashqi ishlar assotsiatsiyasi vakili Nikki Geymer ham vaziyat diplomatlar oilalarida xavotir va norozilikni kuchaytirayotganini ta’kidlagan. Uning so‘zlariga ko‘ra, ayrim oilalar avvalgi evakuatsiyadan keyin endigina joylashishga ulgurgan.

 

Davlat departamenti vakili esa AQSh tomonidan yollangan xodimlar va ularning oila a’zolariga kunlik nafaqa, uy-joy hamda ta’lim xarajatlari uchun yordam ko‘rsatilishini bildirgan. To‘lovlar miqdori mamlakatdagi joylashuvga qarab hukumat tomonidan belgilangan me’yorlarga muvofiq hisoblanadi.

 

AQShning ushbu choralari Yaman husiylarining Saudiya Arabistoniga hujumlari va mintaqada Eron bilan bog‘liq keskinlik kuchayishi haqidagi xavotirlar fonida amalga oshirilmoqda. CNN ma’lumotlariga ko‘ra, Davlat departamenti Livan, Birlashgan Arab Amirliklari, Qatar va Iordaniyada ham diplomatik vakolatxonalar xodimlari soniga vaqtinchalik o‘zgartirishlar kiritilishini tasdiqlagan.