O‘zbekistonlik 82 nafar ziyoratchi Turkiyadagi aeroportda qolib ketdi
Bunga turistik firmalar o‘z majburiyatlarini yetarli darajada bajarmagani sabab bo‘lgan.
2026-yil 18 aprel kuni Saudiya Arabistonidan Turkiya orqali O‘zbekistonga qaytayotgan 82 nafar fuqaroning Sabiha Gyokchen xalqaro aeroportida murakkab vaziyatga tushib qoldi. Bu haqda O‘zbekistonning Istanbuldagi bosh konsulxonasi xabar berdi.
Ma’lum bo‘lishicha, ular "Ihlos Travel” va “Hikmat Travel” nomli xususiy turistik firmalar xizmatlaridan foydalangan holda “Ar-Riyod - Istanbul - Chimkent-Toshkent” yo‘nalishi orqali umra ziyoratini amalga oshirishni rejalashtirganlar.
Biroq, tomonlar o‘zlariga yuklatilgan majburiyatlarni lozim darajada bajarmaganligi oqibatida ziyoratchilar chet elda qiyin hayotiy vaziyatga tushib qolgan.
Shuningdek, holat bo‘yicha tegishli idoralar mas‘ullari bilan masalani hal qilshga qaratilgan muzokaralar olib borilgan, yuqoridagi firmalar mutasaddi xodimlari bilan suhbatlashilgan.
Natijada fuqarolarning vaqtincha tranzit hududida bo‘lishi davomida oziq-ovqat, transport va boshqa zaruriy tovar hamda xizmatlar bilan ta’minlanishiga erishilgan. Ziyoratchilarni kelishilgan yo‘nalish bo‘yicha xavfsiz ravishda O‘zbekistonga qaytarish ishlari to‘liq nazorat ostida amalga oshirilgan.
