Dubayda qozog‘istonlik 22 yoshli yigit umrbod qamoq jazosiga hukm qilindi
Mahkumning yaqinlari uning 2024-yilda ishlash maqsadida BAAga borganini va u yerda haydovchi bo‘lib ishlaganini aytgan.
Birlashgan Arab Amirliklarining Dubay shahrida 22 yoshli Qozog‘iston fuqarosi og‘ir jinoyatlarda aybdor deb topilib, umrbod ozodlikdan mahrum etildi. Bu haqda Qozog‘iston Tashqi ishlar vazirligiga tayanib, Tengrinews xabar berdi.
Vazirlik ma’lumotlariga ko‘ra, 2026-yil 18-mart kuni Dubay birinchi instansiya sudi ushbu fuqaroni bir nechta og‘ir jinoyatlarda aybdor deb topgan va unga nisbatan umrbod qamoq jazosi hamda jarima tayinlagan.
Rasmiylarga ko‘ra, sud hukmi ustidan apellyatsiya shikoyati kiritilgan bo‘lib, hozircha qaror qonuniy kuchga kirmagan.
Qayd etilishicha, Qozog‘istonning BAAdagi elchixonasi mamlakat vakolatli organlariga rasmiy so‘rov yuborgan. Ayni paytda javob kutilmoqda. Dubaydagi Qozog‘iston Bosh konsulxonasi tomonidan fuqaroga zarur konsullik-huquqiy yordam ko‘rsatilayotgani, masala vazirlik nazoratida ekani bildirildi.
Avvalroq mahkumning yaqinlari uning 2024-yilda ishlash maqsadida BAAga borganini va u yerda haydovchi bo‘lib ishlaganini ma’lum qilgan. Qarindoshlari uning aybdorligiga shubha bildirib, yigit tuhmat qurboni bo‘lishi mumkinligini ta’kidlagan.
Ayrim OAVlar mazkur ishni 2025-yil Yangi yil kechasida Dubaydagi villaga uyushtirilgan hujum bilan bog‘lamoqda. Norasmiy ma’lumotlarga ko‘ra, ushbu villada “Finiko” moliyaviy piramidasi asoschilaridan biri Edvard Sabirov yashagan.
